DILI, 28 marsu 2022 (TATOLI) – Vise Ministru Administrasaun Estatál (MAE), Lino de Jesus Torrezão, hateten Governu ho Autoriedade Komunitária Munisípiu Ataúro hahú diskute futuru instalasaun edifísiu.
“Objetivu husi enkontru ida-ne’e hodi ko’alia kona-ba futuru estabelesimentu edifísiu Munisipiu Ataúro nian. Instalasaun edifísiu ne´e atu halo atendementu administrasaun ne’ebé di’ak ba komunidade sira no dezenvolvimentu ne’ebé di´ak liután iha futuru”, Lino hateten ba Agência TATOLI, via telefone, ohin.
Governante ne´e afirma katak ekipa téknika sei aranka iha sábadu (02/04) ba Ataúro hodi halo levantamentu ba fatin refere no bele dezenvolve infraestrutura rai Ataúro nian.
“Ita sei dezenvolve infraestrutura ne’ebé ita presiza tau iha ne’ebá tanba ne’e ita-nia ekipa téknika presiza halo levantamentu ba fatin”, afirma.
Torrezão subliña, levantamentu nesesidade rai, sei envolve hosi Ministériu Obra Públika (MOP), Sektretária Estadu Terras no Propriedade, Ministériu Agrikultura no Peska (MAP).
“Nune’e ita bele hatane medida hosi uma ne’e atu Governu bele halo indeminizasaun ba sira-nia uma. Ho nune’e Governu tuir mai sei halo identifikasaun no hasai dadus ba komunidade afetadu refere”, katak.
Nia haktuir katak MAE mós simu preokupasaun husi komunidade kona-ba hela fatin no komunidade sira husu atu harii fali uma ida dignu ba sira no distánsia ne’ebé besik ho edifísiu.
Iha reuniuan ne´e hetan partisipasaun hosi Administradór Munisípiu Ataúro, Lucio Borremeu de Araújo no representante Konselu Veteranu, Direitór Terras no Propriedade Dili, António Carceres, no Tékniku Cadastro, Arnaldo Gomes, Vise Presidente Konsellu Veterenu no Lideransa Komunitária, Lia-na’in, no Komunidade sira iha Munisipiu Ataúro.
Jornalista : Osória Marques
Editór : Zezito Silva
