DILI, 28 marsu 2022 (TATOLI)—Vise-Ministru Obra Públika (MOP), Nicolau Lino Freitas Belo, hateten, parte ministériu liuhosi Diresaun Jerál Obra Públika no Ajénsia Dezenvolvimentu Nasionál (ADN) finaliza ona dezeñu ona relatóriu finál ponte Bekusi, tanba ne’e tempu badak bele sobu hodi halo konstrusaun foun.
“Daudaun ne’e dezeñu hotu ona no iha ona relatóriu finál, tanba ne’e sei loke konkursu ba emprezáriu sira kompete hodi halo konstrusaun, sé mak manán bele sobu daudaun ona, tanba ida-ne’e urjente duni no hanesan orientasaun hosi Primeiru-Ministru ne’ebé kleur ona, nível tékniku MOP sobu tuir orientasaun ne’ebé iha, ho nune’e tempu badak ita sei sobu tanba finaliza ona dezeñu,” Vise-Ministru Nicolau Freitas informa ba Agência TATOLI Tatoli iha ninia knaar fatin, Caicoli, segunda ne’e.
Notísia relevante: PM orienta MPO-MOP sobu ponte Bekusi no harii foun
Tuir Governante ne’e, ba implementasaun sei utiliza uza osan liña ministeriál, ne’ebé la presiza ba Konsellu Administrasaun Fundu Infraestrutura (KAFI).
Projetu ba KAFI bainhira obra ida ho kustu millaun $1 ba leten, maibé millaun $1 ba raik hanesan projetu ne’ebé ninia verba tama liña ministériál.
Enkuantu, orsamentu ba estudu no dezeñu ponte Bekusi hamutuk $100.000 no ba konstrusaun hamutuk $500.000.
Antes ne’e, iha loron 06 abríl 2021, Primeiru-Ministru, Taur Matan Ruak, fó orientasaun ba Vise Primeiru-Ministru no Ministru Planu Ordenamentu, José Reis no Ministru Obra Públika sesante, Salvador Eugênio Soares dos Reis Pires, atu sobu ponte Bekusi no konstrui foun, nune’e labele fó impaktu negative ba populasaun ne’ebé hela besik mota bainhira akontese inundasaun.
Ponte Bekusi harii iha loron 15 novembru 2016 no ramata iha loron 31 jullu 2018 ho kustu hamutuk $674.456,62.
Jornalista : Arminda Fonseca
Editora : Julia Chatarina
