iklan

NASIONÁL, HEADLINE, KAPITÁL

MOP konvoka enkontru ho kargu xefia hodi haree asuntu kalamidade

MOP konvoka enkontru ho kargu xefia hodi haree asuntu kalamidade

Ministru Obra Públika, Abel Pires da Silva no Vise-Ministru Obra Públika, Nicolau Lino Freitas Belo, hala'o enkontru ho kargu xefia tutela MOP, iha salaun MOP, segunda (28/03). Imajen TATOLI/Francisco Sony

DILI, 28 marsu 2022 (TATOLI)—Ministru Obra Públika (MOP), Abel Pires, segunda ne’e, halo enkontru ho kargu xefia sira hanesan diretór jerál no jerente autónomu sira hodi partilla informasaun no lamentasaun komunidade relasiona ho kalamidade.

Ministru Ministru Obra Públika, Abel Pires da Silva. Imajen TATOLI/Francisco Sony

“Enkontru ohin hodi haree ba asuntu kalamidade, tanba durante ne’e komunidade preokupa ho orsamentu ne’ebé Parlamentu Nasionál aprova ona, maibé realidade la ezekuta, nune’e ita-nia Ministru foun mai atu buka ninia fukun hodi hatene saida mak ita presiza halo, liuliu ba prioridade sira ne’ebé iha área infraestrutura,” Vise-Ministru Obra Públika, Nicolau Lino Freitas Belo, hateten, iha salaun MOP, Caicoli.

Notísia relevante: Abel Pires sei tau atensaun rekupera estragu infraestrutura hosi dezastre naturál

Iha finansiamentu projetu ho kustu millaun $1 mai kraik hosi verba liña ministeriál no iha mós projetu millaun $1 ba leten hanesan projetu hosi ministériu maibé finansiamentu hosi verba Fundu Infraestrutura.

Tanba ne’e, iha reuniaun ohin, MOP husu ba kargu xefia atu hametin liután liña koordenasaun no komunikasaun, nune’e instituisaun hanesan MOP, Ministériu Planu no Ordenamentu (MPO), Ajénsia Dezenvolvimentu Nasionál (ADN)  no Sekretariadu Grande Projetu (SGP) inklui Komisaun Nasionál Aprovizionamentu (CNA, sigla portugés) tenke halo liña komunikasaun di’ak atubele hetan rezultadu di’ak.

Ba kalamidade iha tinan 2022, MOP prevee orsamentu hamutuk milliaun $17 ba Bee Timor-Leste (BTL), Eletrisidade Timor-Leste, Empreza Públika (EDTL, E.P) inklui Estrada, Ponte no Kontrolu Cheia.

Vise-Ministru Obra Públika, Nicolau Lino Freitas Belo. Imajen TATOLI/Francisco Sony

“Ita haree ba orsamentu ne’e la to’o atu kobre ita-nia planu sira, maibé ita simu tanba Parlamentu Nasionál kestiona iha tinan kotuk prevee milliaun $65 maibé la ezekuta ho razaun COVID-19 no limitasaun rekursu umanu iha MOP, ho nune’e mak ita la konsege ezekuta,” Governante ne’e akresenta.

Tuir Vise-Ministru, agora ministru foun mai ho vizaun, misaun no estratejia rasik, katak planu sira ne’ebé durante ne’e la ezekuta presiza didi’ak haree  lei no presiza halo mudansa ba diresaun liuliu presiza kria tan diresaun foun ruma.

“Sujestaun hosi MOP foun katak presiza atu kria diresaun foun hanesan Diresaun Nasionál ba Prevensaun Kalamidade, atu nune’e bele prevene situasaun kalamidade ruma akotese ita bele rezolve liuhosi Diresaun Nasionál espesífiku atu toma nota, nune’e ita labele demora,” nia dehan.

Antes ne’e, MOP identifika estragu sira durante dezastre naturál iha loron 04 abríl 2021 hamutuk 117 iha teritóriu laran tomak kompostu hosi estragu simples 40 no estragu komplexu 77, ho estimasaun kustu pur volta millaun $245.

Antes ne’e, Konsellu Administrasaun Fundu Infraestrutura (KAFI) deside rekupera imediata projetu ualu, ne’ebé hetan estragu tanba inundasaun ne’ebé akontese iha 04 abríl 2021.

Infraestrutura estrada ne’ebé konsege rekupera ona mak Embaixada Japaun oin, enkuantu seluk iha faze konkursu públiku iha CNA.

Iha Orsamentu Jerál Estadu (OJE) 2022, Governu mós prevee ona orsamentu iha fundu infraestrutura hamutuk millaun $332 ba projetu kuaze 700 resin.

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!