DILI, 28 marsu 2022 (TATOLI)—Eskola Ensinu Sekundáriu Tékniku Vokasionál (ESTV) 28 novembru Becora ne’ebé hetan apoiu orsamentu hosi Ministériu Edukasaun Juventude no Desportu (MEJD) atu realiza reabilitasaun infraestrutura eskola, semana ne’e konklui ona prosesu reabilitasaun.
“Prosesu la’o ona, ami daudaun halo serbisu maibé progresu maka ha’u seidauk husu ba tékniku sira. Projetu komunitáriu hadi’a morru eskola besik ona remata, perfurasaun bee-moos atinje ona progresu tanba hetan ona bee-moos, no tanke fatin mós besik ramata ona,” Diretór Eskola ESTV 28 novembru, Pedro da Silva Ximenes, informa ba Agência TATOLI, iha ninia knaar fatin, segunda ne’e.
Notísia relevante: Eskola EBC 30 Agostu Comoro hahú implementa projetu komunitáriu
Reabilitasaun infraestrutura verba tolu hanesan morru eskola hosi parte oin ho medida naruk kuaze metru 91, kompletu ho portaun ne’e falta pinta de’it, perfurasaun hetan ona bee-moos maibé falta instalasaun de’it, no tanke fatin ramata ona hein de’it instalasaun tanke foun ho litru 4.000.
Enkuantu, orsamentu ne’ebé Governu apoiu ba ESTV Becora atu realiza konstrusaun ba verba tolu ne’e hamutuk $34.000, ne’ebé kada verba boot liu maka reabilitasaun ba morru besi ho ho kustu $17.000, hafoin perfurasaun bee-moos ho kustu $15.000, inklui tanke fatin bee-moos ho kustu $2.000.
Totál orsamentu ne’ebé maka MEJD prevee ona ba projetu komunitáriu atu realiza konstrusaun no reabilitasaun ba eskola 197 ho sala aula 651 iha territóriu nasionál ne’e hamutuk $20.274.586,57.
Jornalista : Tomé Amado
Editora : Julia Chatarina
