DILI, 29 marsu 2022 (TATOLI)— Sekretáriu Estadu Terras no Propriedade (SETP), liuhosi Diresaun Nasionál Terras no Propriedade (DNTP), hahú aban (30/03), halo levantamentu rai Estadu ne’ebé empreza ENSUL Engenharia utuliza ba konstrusaun Dili Financial Business Center (DFBC) iha Colmera.
“Ha’u hamutuk ho ekipa, hahú aban, kuarta (30/3) iha tuku 9:00, hala’o levantamentu rai Estadu ne’ebé empreza ENSUL utuliza ba konstrusaun edifisiu Dili Financial Business Centre (DFBC),” Diretór Jerál Sekretáriu Estadu Terras no Propriedade (SETP), Rodrigue Mendonça, hateten ba Agência TATOLI iha nia knaar fatin Colmera-Dili, tersa ne’e.
Notísia relevante: Tempu besik, MJ formaliza akordu arrendamentu ho empreza ENSUL
Ekipa hala’o levantamentu ba rai Estadu ne’e atu kumpre orientasaun Ministru Justisa (MJ), Tiago Amaral Sarmento ne’ebé ho baze ba Lei númeru 1/2003 no dekretu lei númeru 19/2004 ne’ebé ko’alia kona-ba propriedade Estadu no kobra arrendamentu.
“Ita hatene empreza ENSUL liga ba konstrusaun edifísiu Dili Finacial Business Centeri ha dei’t maka akordu espesiál investimentu ho Governu Timor-Leste, maibé laiha akordu arrendamentu ho Governu,” resposavel ne’e akresenta.
Levatamentu ba rai Estadu ne’e ho objetivu atu anexu akordu arrendamentu entre Estadu Timor-Leste ho empreza ENSUL atu kada fulan bele halo pagamentu arrendamentu.
Nune’e, Governu liuhosi Ministru Justisa husu ba SETP halo levantamentu hodi identifika rai nia luan no halo analiza ba konstrusaun DFBC rasik katak iha laran ne’e maizumenus uma hira nia fatin
“Hosi levantamentu sira ne’e maka ita entrega ba iha Ministru Justisa, hodi bele halo analiza atubele halo akordu arrendamentu ida ho empreza ENSUL atu hatene totál osan hira maka empreza bele selu ba Estadu Timor-Leste liga ho sira nian investimentu ne’e rasik,” nia esplika.
Entretantu, Ministru Justisa (MJ), Tiago Amaral Sarmento, antes ne’e, hala’o reuniaun dahuluk ho Prezidente ENSUL engenharia, Alexandre Marques Couto, hodi ko’alia kona-bá konstrusaun Dili Financial Business Center (DFCB), ne’ebé konstrui iha rai Estadu.
Iha enkontru ne’e, Governu hakarak regulariza sira (Empreza ENSUL) kona-ba estatutu rai ne’ebé hala’o konstrusaun no husu atu halo kontratu arredamentu ida ho Governu.
Governu husu ba sira tenke selu arrendamentu ba Estadu kada fulan tanba empreza hotu ne’ebé uza rai Estadu sira selu arrendamentu kada fulan.
Empreza ENSUL Engenharia hosi Portugál hala’o serbisu iha Timor-Leste dezde 2000, asina kontratu atu harii DFCB iha tinan-2012 no lansamentu ba konstrusaun ho fatuk-dahuluk realiza iha loron 16 dezembru 2013.
Ba kestaun ne’e, Prezidente DFBC, Alexadre Marques Couto, hateten investimentu ba konstrusaun DFBC ne’e nuudar Parseria Públiku ho Privadu (PPP) ne’ebé ho akordu espesiál investimentu hahú iha 2010.
Prezidente ne’e mós rekoñese durante ne’e la selu arrendamentu rai ba Estadu tanba iha akordu investimentu ne’e rasik la temi atu selu arrendamentu.
“Maibé, Ministru Justisa husu atu formaliza akordu arrendamentu ba investimentu ne’ebé ami nia parte simu desizaun Governu nian, nune’e investimentu ida ne’e bele la’o di’ak,” nia akresenta.
Enteratantu Konstrusaun Dili Financial Business Center (DFBC) ka Sentru Negósiu no Finansa ne’e pertense ba empreza ENSUL nian, ne’ebe lokaliza iha Kolmera, ho dimensaun 16.000 m².
Daudaun ne’e konstrusaun atinje ona andar-15 ho 60%, ho kustu orsamentu millaun $30 no obra ne’e sei ramata iha tinan-2023 nia rohan.
Notísia relevante: SETP rekolla millaun $4,2 durante tinan-ida hosi arrendamentu rai Estadu
Jornalista: Natalino Costa
Editora : Florencio Miranda Ximenes
