DILI, 29 marsu 2022 (TATOLI)—Ministériu Ensinu Superior Siénsia no Kultura (MESSK) iha trimestre dahuluk tinan ne’e, ezekuta ona Orsamentu Jerál Estadu (OJE) 2022 atinje ona 30,5%.
“Quer dizer ezekusaun orsamentu di’ak, kuandu ha’u halo analiza ba ezekusaun orsamentu ne’e rasik, kompara ho liña ministeriál hotu, ita iha klasifikasaun númeru haat,” Ministru Ensinu Superior Siénsia no Kultura, Longuinhos dos Santos, hateten iha salaun Universidade Orientál Timor-Leste (UNITAL), Becora, tersa ne’e.
Orsamentu 2022 ba MESSK hamutuk $5.186.739, fahe ba kategoria saláriu no vensimentu $1.805.901, bens no servisu $2.871.838, transferénsia públika $ 314.000 kapitál menór laiha, no kapitál dezenvolvimentu $ 195.000.
Hosi portál transparénsia hatudu, MESSK ezekuta ona $922.507,09, saldo atuál $3.419.720,41, obrigasaun $660.169,32, no kompromisu 184.342,18.
Notísia relevante: Reuniaun KROP proposta OJE 2022, MESSK-SEAK husu adisionál millaun $6
Ezekusaun ministériu ne’ebé a’as liu mak Prezidénsia Konsellu Ministru (PCM, sigla portugés) atinje 47%, Ministériu Negósiu Estranjeiru no Kooperasaun (MNEK) 38,8%, Gabinete Primeiru Ministru 36,4%, no Ministériu Ensinu Superiór Siénsia no Kultura (MESSK) 30,5%
“Ita tama kategoria ezekusaun di’ak loos, ita-nia ezekusaun iha primeiru trimestrál ne’e hotu ona, agora ita sei hahú fali reuniaun iha loron 01 ka 02 abríl atu aprezenta fali kornograma ba implementasaun segundu trimestrál nian. Tanba atividade no programa hotu sei hala’o tuir kornograma, nune’e bele garante efetividade no efikásia ba orsamentu ne’e rasik, bainhira laiha sei labele halo buat ida,” nia akresenta.
Orsamentu ne’ebé aloka ba MESSK iha programa prioridade tolu kompostu hosi programa kultura no patrimóniu ho orsamentu $1.215.876, boa governasaun no jestaun institusionál $2.158.828 no edukasaun no formasaun $1.812.035.
Jornalista : Tomé Amado
Editora : Julia Chatarina
