DILI, 29 marsu 2022 (TATOLI)— Observadór internasionál hosi Uniaun Eropeia (UE) hahú ohin, destaka ba munisípiu 12 inklui Rejiaun Administrativa Espesiál Oé-Cusse no Ambeno (RAEOA) atu hala’o observasaun ba atividade kampaña eleitorál no eleisaun prezidensiál segunda volta.
Hafoin ramata misaun ba observasaun kampaña eleitorál ne’ebé realiza iha loron 2 to’o 16 marsu no eleisaun prezidensiál iha 19 marsu iha munisípiu 12 inklui RAEOA.
Adjuntu Misaun Observador Uniaun Europeia, Alexander Grey (liman loos) ho nia ekikpa halo konferensia imprensa iha Hotel Timor, antes dezloka fali ba munisipiu, tersa 29/3/2022 . Imajen TATOLI/ Antonio Dasiparu
“Hahú ohin, ami nia observadór sira sai ona hosi Dili ba hela iha munisípiu 12 inklui RAEOA atu akompaña kampaña eleitorál ne’ebé sei hala’o iha loron 2 to’o 16 abríl no eleisaun Prezidensiál segunda volta iha 19 abríl,” Xefe Adjuntu Misaun Observadór Eleitorál Uniaun Europeia, Alexander Gray, hateten ba jornalista-sira iha Hotél Timor-Dili, tersa ne’e.
Totál observadór internasional EU hamutuk 30-resin, hosi númeru ne’e na’in rua destaka iha munisipiu ida no 10 iha munisipiu Dili. Enkuantu hosi númeru ne’e mós inklui husi nasaun membru EU hamutuk 17 nian.
Observadór UE sei akompaña etapa hotu-hotu prosesu eleitorál nian, inklui períodu kampaña, votasaun, kontajen votu no kualkér disputa eleitorál sira.
Misaun Observadór EU sei hala’o mós monitorizasaun abranjente ba meiu komunikasaun sosiál tradisionál no rede sosiál sira.
Iha loron eleisaun, observadór sira ba kurtu prazu sei reforsa tan misaun Timór-oan besik na’in-50 hodi suporta servisu misaun Observadór Eleitorál Uniaun Europeia nina sei nafatin iha Timor – Leste to’o prosesu eleitorál ramata.
Metodolojia observasaun hosi UE
Observadór UE kontinua aplika nafatin metodolojia hanesan iha nasaun hotu hanesan observasaun ida ne’ebé komprensivu no longu prazu ho kobertura ne’ebé aumenta iha loron eleisaun nian ho ninia avaliasaun imparsiál no independente hosi ninia instituisaun sira.
Observadór sira halo tuir prátika la’ós-interferénsia iha prosesu eleisaun no kooperasaun ho nasaun akollimentu inklui rezultadu observasaun hosi Misaun EleIotrál UE sei disponivel ba públiku.
Nune’e, misaun ne’e sei fó sai deklarasaun preliminár hafoin loron eleisaun no relatóriu finál ida ne’ebé sei inklui rekomendasaun lubun ida ba prosesu eleitorál sira iha futuru no sei aprezenta no fahe ho parte interesadu sira hafoin ramata prosesu eleitorál tomak.
Observasaun eleitorál hanesan komponente esensiál ida hosi atividade sira Uniaun Europeia nian hodi promove demokrasia, direitu umanu no Estadu direitu.
Tanba observasaun eleitorál bele kontribui atu hametin instituisaun demokrátiku sira, harii konfiansa públiku iha prosesu eleitorál no ajuda evita fraude, intimidasaun no violénsia eleitorál.
Notísia relevante: Observadór 24 hosi UE to’o ona Timor-Leste
Jornalista: Hortencio Sanchez
Editór : Florencio Miranda Ximenes
