DILI, 29 marsu 2022 (TATOLI)-Jestór Merkadu Manleuana Dili, Julio Barros Caldas hateten toilet haat iha merkadu Manleuana kleur ona la funsiona ho diak tanba kondisaun obra ne’e komesa aat ona.
Merkadu Manleuana iha toilet hamutuk neen, maibé rua mak sei funsiona no haat aat ona komesa iha tinan 2014 to’o ohin loron.
“Haris fatin kuaze rahun, hanesan nia didin lolon sira dodok no monu hotu, fatin so’e bee boot rahun, odamatan laiha, entaun haris fatin haat ne’e agora labele uza ona,” Julio Barros Caldas hato’o preokupasaun ne’e ba Agênsia Tatoli, iha Manleuana, Dili, ohin.
Negosiante sira hahú okupa merkadu ne’e iha tinan 2011 liubá, tanba ne’e persiza halo manutensaun ba obra ne’e, atu nune’e bele fasilita diak liután populasaun sira hodi faan sira-nia produtu.
“Ha’u asume responsabilidade ne’e hahú hosi 2020, hosi ne’e ha’u halo ona karta haruka ba ona Autoridade Munisípiu Dili atu halo reabilitasuan ba buat sira ne’e, maibé to’o agora seida’uk hadi’a,” nia hateten.
Hatan ba preokupasaun ne’e, Xefe Departamentu Jestaun no Merkadu, Arthur Hendriques, hateten iha tempu badak Autoridade Munisípiu Dili sei halo reabilitasaun ba toilet haat ne’ebé maka la funsiona.
“Ha’u só responsabiliza ba 2021 hahú iha fulan Outubru ne’e ba oin. Tanba ne’e, ha’u hatama hotu ona planu sira ne’e ba Prezidente Autoridade Munisípiu (PAM), nune’e mós, orsamentu tau kompletu, ne’ebé agora ita hein de’it desizaun hosi PAM ba reabilitasaun merkadu sira,” nia esplika.
Entretantu, vendedór hamutuk ema na’in 849 maka daudaun ne’e okupa espasu iha merkadu Manleuana hodi faan sira-nia produtu.
Jornalista : Nelia Fernandes
Editór : Agapito dos Santos
