DILI, 29 marsu 2022 (TATOLI)–Sekretária Estadu Kooperativa (SEKoop), Elizário Ferreira, tersa ne’e, relata progresu no relatóriu serbisu instituisaun ba Primeiru-Ministru, Taur Matan Ruak, ne’ebé iha biban ne’e Xefe Governu husu atu intensifika programa.
“Primeiru-Ministru bolu ha’u mai atu aprezenta relatóriu serbisu no fó orientasaun atu aselera programa SEKoop. Ha’u relata kona-ba serbisu ne’ebé halo iha tinan 2021, ezemplu tempu ne’ebá iha alvu ba edukasaun no formasaun ema na’in 2.800, maibé ninia alvu ne’e liu katak ema besik 10.000 hosi SEKoop,” Sekretáriu Estadu informa hafoin hasoru Xefe Governu, iha Palásiu Governu.
Aleinde ne’e, serbisu seluk kona-ba instalasaun kooperativa SEKoop, nia alvu atu estabelese koopertiva iha suku 252, maibé ho sirkunstánsia oioin konsege estabelese de’it kooperativa nível suku hamutuk 214.
Ba kooperativa kréditu iha espetativa estabelese iha postu administrativu 65, maibé konsege estabelese de’it iha postu administrativu 60, hela lima mak seidauk.
Notísia relevante: SEKoop hahú prepara joven 211 fila ba kampu fortalese kooperativa
“Programa kria kondisaun merkadu ba produtór sira, ida-ne’e ami dada produtór sira ho motivasaun, edukasaun, formasaun no diseminasaun informasaun SEKoop hodi kontribui hasa’e produsaun iha rai-laran,” nia tenik.
Enkuantu, programa sira iha tinan 2022 maka sei kontinua nafatin, hanesan programa neen kompostu hosi estabelesementu fortalesimentu institusionál entre SEKoop ho movimentu kooperativa sira, edukasaun formasaun informasaun, estabelesementu kooperativa, asegura kooperativa atu hala’o liña kréditu ida ne’ebé maka saudável no sustentável, no iha estabilidade finanseira ne’ebé di’ak, lori joven fila ba kampu no ikus liu mak kriasaun merkadu ba produtór sira.
“Iha aumentu programa haat hanesan Cesta Bázika hanesan parte hosi programa anuál ne’ebé parte SEKoop atu serbisu hamutuk ho kooperativa sira atubele asegura produsaun no distribuisaun ne’ebé di’ak inklui programa seluk maka promove no reforsu programa agríkola oinsá maka agrikultór sira bele aumenta produsaun ne’ebé di’ak atu oferese ba merkadu,” governante ne’e subliña.
Nune’e mós, promove no reforsu ba kooperativa peska liuhosi asegura formasaun ba peskadór sira no programa medisina verde, tanba tempu funu gerrileiru sira uza ai-abut no ai-talik sira ba aimoruk, maibé funu hotu tiha la uza ona.
“Entaun parte kooperativa eduka filafali ita-nia populasaun atu kuda ai sira ne’ebé bele halo medisina herbál, hafoin kooperativa forma hodi fasilita bele kria kondisaun, liliu estabelese fatin prosesamentu atubele kria aimoruk herbal tanba ita labele depende demais ba aimoruk importadu,” Sekretáriu Estadu dehan.
Jornalista : Antónia Gusmão
Editora : Julia Chatarina
