Aban, Prezidente Repúblika fó pose ba membru Governu na’in-rua
DILI, 30 marsu 2022 (TATOLI)—Prezidente Repúblika, Francisco Guterres Lú Olo, liuhosi dekretu Prezidente Repúblika númeru 20/2022, fó pose ba membru VIII Governu konstituisionál na’in-rua.
Membru Governu na’in-rua ne’ebé hetan nomeasaun hosi Prezidente Repúblika bazea ba proposta hosi Xefe Governu mak hanesan Sekretáriu Estadu ba Terras no Propriedade, Eldino Rodrigues dos Santos ho Sekretária Estadu ba Igualdade no Inkluzaun, Maria do Rosario Fátima Correia.
“Prezidente Repúblika, Franciso Guterres Lú Olo, sei fó pose ba membru Governu na’in-rua iha kinta-feira, 31 marsu 2022, tuku 9.30, iha Palásiu Prezidensiál Nicolau Lobato,” refere komunikadu imprensa ne’ebé Agência Tatoli asesu. kuarta ne’e.
Prezidente Repúblika uza nia kompeténsia konstitusionál tuir artigu 106 númeru 2 halo nomeasaun ba membru Governu bazea ba proposta hosi Primeiru Ministru.
Liuhusi Dekretu Prezidente Repúblika númeru 19/2022, bazea ba proposta Primeiru-Ministru nian, Prezidente Repúblika ezonera Sekretáriu Estadu ba Terras no Propriedade, Mario Ximenes no Sekretária Estadu ba Igualdade no Inkluzaun, Maria José da Fonseca Monteiro de Jesus.
Jornalista : Nelson de Sousa
Editór : Cancio Ximenes
