Emprezáriu timor-oan husu Governu valoriza produtu lokál
DILI, 30 marsu 2022 (TATOLI)—Emprezáriu timor-oan husu Governu kolabora ho emprezáriu lokál sira hodi valoriza produtu lokál ne’ebé prodús hosi timor-oan rasik, nune’e bele hasa’e produsaun rai-laran, tanba haree ba kondisaun Timor-Leste enfrenta menus mina-sona.
“Hanoin mina-sona ne’ebé tempu badak sei la tama iha ita-nia rai, ita labele preokupa. Tempu to’o ona atu tai importánsia no fó oportunidade ba Governu atu identifika ba produsaun mina-nuu iha Timor-Leste, tanba ita rasik bele prodús,” Diretór Souro Coconut Oil Cipriano Felix, Unipesoál LDA, Arsénio Cabral, hateten ba Agência TATOLI, telefónika, kuarta ne’e.
Notísia relevante: Timor-Leste ameasadu enfrenta menus mina-sona iha merkadu
Nia dehan, bainhira Governu tau ona importánsia ba produtór mina-nuu, agrikultór sira sei halo reflorestasaun ba nuu, nune’e fó esperansa ba produsaun mina-nuu bele sa’e maka’as.
“Ami preparadu halo produsaun ba mina, maibé Governu prontu atu fó kontratu ba ami ka lae, tanba bainhira Governu fó kontratu ami sei halo produsaun barak hodi atende ba komunidade sira-nia preokupasaun, tanba produtu ne’ebé ita uza ne’e foti de’it iha rai-laran. Ida-ne’e sei fó esperansa ba kompañia ida bele halo produsaun barak liután no hatuun nia folin, nune’e komunidade bele iha kbiit sosa,” nia akresenta.
Tuir Arsénio Cabral, mina sira ne’ebé importa hosi rai-li’ur ne’e folin baratu, maibé kahur ho kímiku, kompara ho produtu lokál ho folin sa’e oituan maibé la uza kímiku.
“Husu ba Governu atu hahú promove daudaun ona produsaun ne’ebé timor-oan rasik prodús iha rai-laran, tenke konsidera produtór sira no identifika produsaun ne’ebé ita prodús, nune’e labele depedente ba importasaun de’it. Daudaun ne’e la’ós mina-sona de’it mak timor-oan sira bele prodús, maibé buat barak hanesan ai-fuan no hahán seluk, maibé buat sira ne’e presiza Governu tau-atensaun hotu nune’e iha valór,” nia fó hanoin.
Apresia ho programa Cesta Bázika
Iha sorin seluk, Emprezáriu timor-oan ne’e agradese ba Governu tanba implementa ona programa Cesta Bázika etapa dahuluk no tuir mai ba daruak, tanba programa bele envolve entidade sira hodi intensifika produsaun iha rai-laran.
“Ha’u hanesan na’in ba produtu Souro Coconut oil, kontete ba programa ne’e, tanba ami mós sai pilotu ida ba programa ne’e. Tanba sosa ho kuantidade boot, entaun ami mós iha vontade no motiva tan ita-nia agrikultór sira hodi kuda nuu foun no sira seluk,” Arsénio Cabral dehan.
Notísia relevante: Governu koordena servisu molok implementa programa Cesta Bázika daruak
Daudaun ne’e mina ne’ebé empreza ne’e prodús prepara ba Cesta Bázika ne’ebé sei lansa ba tinan ne’e (faze daruak) hamutuk tonelada 200 no Cesta Bázika tinan kotuk (faze dahuluk) sira halo produsaun hamutuk tonelada 270.
Kompañia Souro Cocounut oil rasik daudaun ne’e fó ona serbisu ba traballadór timor-oan na’in-200.
Antes ne’e, Prezidente Komérsiu Kámara Industria (CCI-TL), Oscar Lima, hateten, iha tempu badak Timor-Leste sei ameasadu enfrenta menus mina-sona tanba nasaun produtór la halo exportasaun.
“Ha’u hanoin fulan ka rua mina-sona sei menus iha merkadu tanba nasaun produtór mina la autoriza halo exportasaun, tanba stock iha nasaun exportadór mina mós hahú menús, nune’e kondisaun ne’e afeta ba país hotu inklui Timor-Leste,” nia hateten.
Jornalista : Arminda Fonseca
Editora : Julia Chatarina
