OPINIAUN

Kampaña Eleitorál iha Timor-Leste: Sá mak bele no labele halo

Kampaña Eleitorál iha Timor-Leste: Sá mak bele no labele halo

Hakerek na’in, Afonso Soares.

Hakerek na’in:
Afonso Soares

Iha país ne’ebé adota sistema demokrátiku, eleisaun nu’udar meiu úniku no prinsipál, hodi eleje titulár orgaun sira Estadu nian. Timor-Leste hanesan mós Estadu ida ne’ebé adota rejime demokrátiku, nune’e titulár órgaun sira, hanesan Xefe Estadu no membru sira Órgaun Lejislativa nian eleje liuhusi sufrájiu universál, ne’ebé hala’o ho natureza livre, diretu, sekretu, pesoál no periódiku, hanesan defini iha artigu 65/1 Konstituisaun RDTL.

Artigu ida-ne’e hakarak aprezenta ba públiku, tantu ba eleitór no ba kandidatu sira, finalidade husi kampaña eleitorál, prátika sá mak bele no labele halo iha kontestu kampaña eleitorál nian, nune’e mós konsekuénsia sira tuir perspetiva legál iha kontestu Timor-Leste, inklui perspetiva pesoál balu kona-ba prátika sira iha períodu pré-eleitorál no pos-eleitorál, ho ninia kontribuisaun ba rezultadu finál eleisaun nian. Iha sentidu ne’e, previzaun legál ba prátika sira refere eziste hela, maibé ignoránsia husi sidadaun sira balu kontinua iha, ne’ebé hamosu reasaun oioin (psikolójika no fízika/violentu) no, ikus-mai, mosu inkonsisténia entre prátika sira iha atividade polítika partidária nian i natureza loloos husi kampaña eleitorál.

Kampaña Eleitorál, tuir konseitu ne’ebé disponível iha Wikipédia, a Enciclopédia Livre, nu’udar períodu eleitorál ida, iha ne’ebé partidu polítiku no kandidatu sira aprezenta ba sidadaun eleitór sira, programa no prioridade polítika sira, ho objetivu atu buka votus.

Konseitu hanesan mós ita bele hetan iha Dicionário Priberam da Língua Portuguesa, iha ne’ebé define kampaña eleitorál hanesan períodu ne’ebé antesede (eziste molok) eleisaun ida no durante tempu ne’e mós kandidatu ba kargu polítiku sira aprezenta ba sidadaun hotu tentativa atu promove aan no halo angariasaun ba votus.

Iha konseitu sira ne’e, ita bele anota elementu prinsipál tolu ne’ebé nesesáriu atu nune’e kampaña eleitorál ida bele akontese, sidadaun-kandidatu (sidadaun ho kapasidade eleitorál pasiva), kompromisu eleitorál (programa eh prioridade polítika) no sidadaun-eleitór (sidadaun ho kapasidade eleitorál ativa). Iha sentidu ne’e, sidadaun-kandidatu sira, liuhusi meiu kampaña, komunika sira-nia kompromisu eleitorál ba sidadaun eleitór sira, ho objetivu atu konvense sira, hodi bele hetan votu husi sira.

Bainhira ita observa ambiente kampaña eleitorál ne’ebé hala’o, maioria kampaña eleitorál akontese entre sidadaun-kandidatu no sidadaun-eleitór sira, ne’ebé adere/unifika ona iha konviksaun polítika partidária ida ho ideolojia polítika hanesan, iha ne’ebé komunga nanis ona prinsípiu, valór no doutrina polítika ida de’it. Tuir ha’u, ba sira ne’e, nesesita liu atu halo kampaña polítika, envezde kampaña eleitorál, tanba sira la’ós sidadaun-eleitór ne’ebé presiza atu konvense, sira konvensidu tiha ona! Kampaña polítika hala’o atu konkista nafatin konfiansa husi sidadaun-eleitór sira ne’ebé komunga ona doutrina partidu nian, atu mantein votus, enkuantu kampaña eleitorál hala’o atu oinsá konvense sidadaun-eleitór sira mak seidauk konvensidu, hodi konkista tan sira-nia votus.

Kampaña eleitorál, iha parte ida, utiliza propaganda eleitorál nu’udar mekanizmu ida, hodi promove ba sidadaun-eleitór sira, atu bele hatene sidadaun-kandidatu no sira-nia kompromisu eleitorál nian no, iha parte seluk, sai hanesan meiu ida atu manán konfiansa foun, liuhusi komentáriu, observasaun no krítika sira ne’ebé hato’o ho natureza polítika, maibé ho karáter edukativu, profisionál no étika. Infelizmente, iha kampaña sira, ita bele anota, seidauk iha aproveitamentu másimu ba meiu sira refere, tuir natureza no finalidade loloos, iha prosesu oinsá bele konkista votus foun hosi sidadaun eleitór sira.

Prinsípiu sira (Konstitusionál no Legál) ne’ebé garante realizasaun kampaña eleitorál, hanesan liberdade ba propaganda eleitorál, igualdade ba oportunidade nomós tratamentu ba kandidatu sira, imparsialidade husi entidade públika ba kandidatu sira, transparénsia no fiskalizasaun ba konta sira eleitorál nian, sira ne’e hotu presiza atu dezenvolve atividade sira sensibilizasaun nian, hodi hasa’e koñesimentu sidadaun sira-nian, atu garante realizasaun kampãna tuir ninia natureza no finalidade, nune’e bele nafatin kontribui ba pás no estabilidade.

Lei fundamentál/Konstituisaun RDTL garante propaganda eleitorál hanesan prinsípiu ida iha ámbitu kampaña eleitorál nian no, garantia hanesan mós konsagra iha Lei Eleitorál ba Prezidente Repúblika, Lei Eleitorál ba Parlamentu Nasionál, nune’e mós Regulamentu ba Kampaña no Propaganda Eleitorál nian, ho limitasaun sira balu iha atividade polítika partidária nian, ne’ebé esensiál tebes ba sidadaun sira hotu, atu hatene.

Bazeia ba Lei sira mak temi iha leten, propaganda eleitorál nu’udar atividade hotu ne’ebé hala’o ho forma direta eh indireta, ho objetivu atu promove kandidatu, partidu polítiku ka koligasaun partidária sira, ne’ebé bele halo liuhusi publikasaun testu ka imajen, hodi fó-sai no reprodús konteúdu husi atividade sira refere.

Situasaun ne’e, bainhira ita haree regulamentu ne’ebé temi iha leten, propaganda eleitorál iha ninia limitasaun sira, ne’ebé mak ezije pesoál sira hotu atu hala’o atividade sira propaganda nian, tuir de’it limite sira refere. Maibé, kestaun ne’ebé ita sei dúvida mak: sidadaun sira hotu hatene eh lae limitasaun husi atividade sira kampaña no propaganda eleitorál nian? Iha enkuadramentu legál ba sistema eleitorál nian, ita bele anota no klasifika limite sira ba dimensaun rua, hanesan materiál no komportamentu umanu.

Limitasaun sira iha dimensaun materiál iha kontestu kampanã eleitorál, bazeia ba artigu 3/3 husi regulamentu kona-ba kampaña no propaganda eleitorál nian, materiál sira ne’ebé uza iha propaganda eleitorál mak kartás, bandeira, panfletu, testu, spot televizivu eh rádiu, filme no tipu propaganda sira hotu iha ámbitu difuzaun orál iha meiu-komunikasaun sosiál eh iha públiku nomós objetu sira seluk hodi promove kandidatu, partidu polítiku eh koligasaun partidária sira.

Iha parte seluk, enkuantu dimensaun komportamentu umanu nian, regulamentu refere ezije iha artigu 6/3 atu kandidatu no apoiante sira orienta komportamentu sira bazeia ba determinasaun legál sira, hanesan realiza kampaña ho forma pozitiva, partisipa iha prosesu eleitorál ho forma pasífika, demokrátiku no transparente, uza linguajen sira ne’ebé kontribui ba pás, livre husi difamasaun, ameasa, violénsia, evita krítika sira ho natureza pesoál ka grupu, koopera ho orgaun eleitorál, ofisiál, observadór, entidade públika eh privada sira seluk, inklui kandidatu no apoiante sira seluk, evita uza patrimóniu Estadu no labele aproveita kargu públiku ruma nu’udar instrumentu ba propaganda eh kampaña eleitorál, respeita data kalendáriu eleitorál nian, kompromete atu rezolve disputa sira iha kampaña no propaganda eleitorál ho forma pasífika no liuhusi diálogu.

Limitasaun sira iha leten, sai hanesan prátika sira ne’ebé lei la permite atu halo. Iha ita-nia kontestu, sein krime laiha responsabilidade, enkuantu iha krime iha responsabilidade, ne’e nu’udar prinsípiu ida atu bele sukat ita-nia komportamentu no prátika sira hotu, iha períodu kampaña eleitorál, tanba hafoin períodu eleitorál, kandidatu sira ne’ebé manán, sei prepara atu hetan pose ba kargu, maibé sidadaun-eleitór sira balu, bele prepara atu hetan responsabilidade penál ruma, liga ho komportamentu individuál ruma, ne’ebé hatudu violasaun ba kondisaun sira iha leten.

Iha ita-nia kontestu jurídiku, responsabilidade kriminál liga ho infrasaun kriminál sira ne’ebé defini iha Kódigu Penál asumi ho karáter individuál no labele tranzmite ba ema seluk, tuir determinasaun iha artigu 12/1 husi Kódigu refere. Iha sentidu ne’e, prátika individuál ruma mak hamosu violasaun iha atividade koletiva “kampaña eleitorál”, sei asumi responsabilidade ho karáter individuál no responsabilidade ida-ne’e bele inklui mós iha área dixiplinár nian, bainhira pesoál ho kualidade nu’udar Funsionáriu Públiku eh Ajente Administrasaun Públika.

Iha Kódigu Penál, aleinde krime sira seluk iha kontestu eleitorál nian, iha mós responsabilidade kriminál husi kualkér pesoál, ne’ebé hamosu prátika sira mak konsidera nu’udar Propaganda Eleitorál Ilísita, iha ne’ebé tuir artigu 233/1 husi Kódigu Penál, sé mak uza meiu propaganda eleitorál nian ne’ebé lei lapermite ka hala’o nafatin propaganda aleinde prazu nomós hala’o iha lokál ne’ebé lapermite, sei hetan responsabilidade penál ho prizaun tinan-1 eh multa. Nune’e, sidadaun-eleitór sira, di’ak liu sukat asaun sira mak hamosu iha períodu kampaña eleitorál nian, iha parte ida, atu bele fó-apoiu ba kandidatu, partidu polítiku eh ba koligasaun partidária ruma no, iha parte seluk, evita husi responsabilidade sira mak bele hetan, tantu kriminál, nune’e mós dixiplinár.

Ho konsiderasaun ba prátika sira ne’ebé integra ba dimensaun rua iha leten, importante tebes atu reforsa papél kontrolu no fiskalizasaun husi entidade relevante sira, nune’e bele garante realizasaun kampaña eleitorál, ne’ebé livre husi prátika sira hotu mak lei la permite atu halo. Papél ida-ne’e, loloos nu’udar devér sidadaun hotu nian, liuliu observadór no ofisiál relevante sira seluk mak marka prezensa iha prosesu hotu, atu garante katak kualkér ema labele hamosu asaun ruma mak ultrapasa limite sira refere.

Iha prosesu no etapa sira hotu mak hala’o hodi hili titulár ba órgaun sira mak eleje liuhusi sufrájiu universál, ita anota períodu esensiál tolu ne’ebé akontese tuir ida-idak nia faze, maibé iha relasaun interdependente, iha ne’ebé kontribui ba rezultadu finál eleisaun ida nian, hanesan períodu pré-eleitorál (resenseamentu & kampaña eleitorál), períodu eleitorál (votasaun) no períodu pos-eleitorál (apuramentu ba rezultadu eleisaun, rekursu, proklamasaun ba rezultadu no validasaun ba eleisaun).

Iha períodu tolu ne’ebé temi iha leten, maski ha’u laiha baze teórika forte hodi argumenta no valida klasifikasaun refere, etapa hirak ne’e mak, pratikamente, akontese iha prosesu sira ne’ebé hala’o hodi eleje demokratikamente titulár orgaun soberania sira. Situasaun ne’e, tuir hau nia haree, rezultadu finál eleisaun nian, presiza determina ho baze ba prátika sira ne’ebé akontese iha períodu sira refere, nune’e rezultadu eleisaun husi dimensaun kuantitativa, nu’udar kontribuisaun mós hosi dimensaun kualitativa (komportamentu kandidatu no apoiante sira, hahú husi faze resenseamentu eleitorál to’o apuramentu rezultadu). Prátika ida ne’e halo atu asegura bainhira mosu violasaun ruma iha períodu sira refere, naturalmente, ezijénsia ba responsabilidade nafatin individuál, maibé iha mós ninia konsekuénsia ba rezultadu finál eleisaun ida-nian. Bainhira ita introdús mekanizmu ida ne’e, sei kontribui espontáneu no pozitivamente ba kualidade, edukasaun no profisionalizmu prosesu eleitorál nian iha ita-nia kontestu.

Hakerek na’in lisensiadu iha Direito husi UNTL/FUP no konklui mós pós-graduasaun ida husi Fakuldade Direito Universidade Nova Lisboa no nu’udar Asesór Jurídiku iha KFP.

Referénsia sira:
Konstituisaun RDTL;
Lei N.º 15 /2021, loron 14 fulan-Jullu, VI alterasaub ba Lei n.º 7/2006, loron 28 fulan-Dezembru (Lei Eleitorál ba Prezidente Repúblika);
Lei N.º 9/2017, loron 5 fulan-Maiu, IV alterasaun ba Lei n.º 6/2006, loron 28 fulan-Dezembru (Lei eleitorál ba Parlamentu Nasionál);
Dekretu Governu N.° 3/2022, loron 10 fulan-Janeiru, I alterasaun ba Dekretu Governu n.º 5/2017, loron 27 fulan-Fevereiru, Regulamentu ba Kampaña no Propaganda Eleitorál;
Kódigu Penál Timor-Leste nian;
https://pt.wikipedia.org/wiki/Campanha_eleitoral [asesu iha 25-03-2022];
https://dicionario.priberam.org/campanha%20eleitoral [asesu iha 25-03-2022].

iklan
iklan

Leave a Reply

iklan
error: Content is protected !!