DILI, 31 marsu 2022 (TATOLI)—Governu liuhosi Komisaun Nasionál Eleisaun (CNE-sigla portugés) no Sekretariadu Tékniku Adminitrasaun Eleitorál (STAE), kinta ne’e, halo abertura no Imprensa Nasionál Timor-Leste (INTL) hahú imprime buletin votu ba eleisaun prezidensiál segunda volta.
Notísia Relevante: INTL toma konta imprime boletin votu Eleisaun Prezidensiál 2022
Prezidente Komisaun Nasionál Eleisaun (CNE-sigla portugés), José Agostinho da Costa Belo, hateten ho lansamentu no abertura ba imprime buletin votu presiza servisu hamutuk, unidade no iha pensamentu ida de’it atu bele halo di’ak liután festa demokrásia ne’e.
“Ita tenke halo di’ak mesmu surat-tahan ne’e ita haree la vale maibé kandidatu na’in-rua, ida sai prezidente ita-nian tanba ne’e mak ita servisu ho dignu no ho laran. Ita servisu hamutuk, nune’e surat-tahan ne’e sai realidade bainhira ita fó votu ne’ebé di’ak no ho konsiénsia, nune’e ida sai prezidente no ukun ita ho di’ak,” Prezidente CNE ne’e hateten iha serimónia lansamentu no abertura emprime buletin votu iha INTL, Dili.
Diretór Jerál Sekretariadu Tékniku Adminitrasaun Eleitorál (STAE), Acilino Manuel Branco, hateten buletin votu hanesan matadalan hodi deside kandidatu na’in-rua ne’e, kandidatu ida-ne’ebé mak sei eleitu sai Prezidente Repúblika Timor-Leste.
“Ita hotu hatene katak buletin votu ne’e matadalan ida-ne’ebé importante liuhosi materiál sira seluk, tanba ne’e mak ba empreza nasionál ba dala rua hetan fiar hosi Estadu, liuhosi Governu ha’u hato’o mensajen ba ita atu responsabilidade ho másimu ba servisu ne’e,” nia hateten.
Diretór ne’e enkoraja parte téknika INTL nian katak tenke servisu ho laran, onestidade, nune’e iha rezultadu ne’ebé di’ak no hein katak bulletin votu ne’e ninia kualidade di’akliu iha eleisaun primeira volta ne’e.
Iha lansamentu no abertura ba emprime buletin votu ba segunda volta ne’e hetan partisipa hosi Prezidente no Vise-Prezidente CNE ho inklui Komisáriu sira, Ekipa STAE, reprezentante kandidatu PR, observadór nasionál no Internasionál.
Atu asegura materiál eleisaun ne’e, Komandu Polísia Nasionál Timor-Leste (PNTL) destaka kedas membru PNTL hodi akompaña durante oras 24 nia laran ba prosesu tomak iha emprime buletin votu, nune’e labele mosu irregularidade balun iha prosesu ne’e tomak.
Jornalista : Osória Marques
Editór : Cancio Ximenes
