AINARO, 01 abríl 2022 (TATOLI) – Xefe Klínika São Joaquim Maubisse, Angelica dos Reis, hateten estudante eskola ha’at (4) hanesan Eskola Pré-primária Usululi Maulau, Pré-sekundária Santo Inácio Maubisse, Sekundário São Paulo Maubisse no Pré-sekundário Remori Maubisse hamutuk 608 mak simu ona vasina Pfizer.
“Totál estudante ne’ebé ami atende ba vasina Pfizer ni’an hamutuk 608, hosi númeru ne’e kompostu hosi eskola ha’at”, Angelica dos Reis, hateten ba jornalista sira iha nia kna´ar fatin, Klínika São Joaquim Maubisse.
Nia haktuir, molok implementa programa vasina ba estudante sira, hahú hosi idade 12 to’o 17, pessoál saúde sira halo advokásia ba Xefe Suku, Profesores no Inan aman sira. Vasina Pfizer ne’ebé Klínika São Joaquim Maubisse fó ba estudante sira ne’e, hahú iha 23 to’o 31 marsu ne’e.
“Bainhira halo advokasia hotu mak ami halo ami-nia micro planu ba eskola sira ne’ebé ami atu ba atende. Hosi ne’e, ami mós hato’o formatu inumerasaun no karta rekonesimentu hosi inan-aman ba labarik sira, atu nune’e inan-aman sira kuandu hatan no koolabora ho professor sira mak ami foin tun ba fó vasinasaun ba labarik sira ne’e”, rekorda.
Tanbá, tuir observasaun iha terrenu katak estudante maioria hakarak simu vasina Pfizer, maibé minória liu mak inan-aman sira sei duvida no tauk atu fó sira-nia oan ba vasina.
“Ezemplu, horseik ekipa pesoál saúde ida to’o ba eskola Pré-primária iha Likitei labarik sira la mai, tanba inan-aman sira mak la fó, entaun professor sira mós la hatan atu pesoál saúde sira vasina“`katak.
Maske nune´e, iha maioria eskola ne’ebé preparadu, liliu iha eskola Santo Paulo ho Santo Inácio ni’an koolabora kapas ho ami hodi fó vasina ba estudante sira.
Entretantu, iha programa vasinasaun Pfizer ne’e iha ekipa ha’at, kompostu hosi pesoál saúde hamutuk 12 mak durante ne’e tun ba eskola sira hodi fó vasina ba estudante sira.
Jornalista : Nelia Fernandes
Editór : Zezito Silva
