iklan

NASIONÁL, HEADLINE, INKLUZAUN SOSIÁL

Governu halo esforsu rekupera estragu infraestrutura públiku impaktu hosi kalamidade

Governu halo esforsu rekupera estragu infraestrutura públiku impaktu hosi kalamidade

Kondisaun estrada dirasaun Beduku ne’ebé hetan estragu tanba inundasaun ne’ebé akontese iha loron 04 abríl. Imajen TATOLI/António Gonçalves

DILI, 01 abríl 2022 (TATOLI)–Primeiru-Ministru (PM), Taur Matan Ruak, hateten daudaun ne’e Governu liuhosi Ministériu Obra Públika (MOP), Ministériu Planu no Ordenamentu (MPO), Ajénsia Dezenvolvimentu Nasionál (ADN) halo esforsu hodi rekupera infraestrutura públika sira ne’ebé hetan estragu durante kalamidade iha loron 04 abríl 2021.

“Ha’u-nia orientasaun sira tenki hadi’a no hadi’a ho kualidade, tanba problema ida normalmente kuandu halo infraestrutura, ita la tau atensaun maka jestaun risku ambientál ho risku sosiál, ita nunka estraga infraestrutura ida, maibé tanba udan mai mak ita tenki halo di’ak ou halo foun,” PM relata liuhosi konferénsia imprensa iha Rezidénsia Metiaut, sesta ne’e.

Notísia relevante: Kustu estimasaun estragu infraestrutura públika millaun $300-resin

Ho kondisaun ne’e maka ekipa responsável konstrusaun infraestrutura hosi liña ministeriál hanesan MOP, MPO, ADN, no Konsellu Administrasaun Fundu Infraestrutura (KAFI), Ministériu Finansa (MF) no Ministériu Transporte no Komunikasaun (MTK) hahú sobu iha fatin-fatin no tenta posível rekupera infraestrutura.

Estragu sira fahe ba tipu tolu hanesan kama’an, todan natón no todan liu, nune’e tempu preparativu tenki di’ak.

“Tanba ne’e maka lori tempu oituan, maibé Governu naturalmente iha preokupasaun no halo esforsu hotu hodi ajuda rekupera infraestrutura sira. Ita haree Dili laiha planu ordenamentu ema harii uma iha fatin ne’ebé de’it tuir sira-nia hakarak, dala barak hetan risku, dehan Governu mak sala, Governu simu tanba ita laiha planu, espera katak ba-oin ita hadi’a. Projetu boot ida ne’ebé ita halo parseria ho Estadu unidu ho valór millaun $600 hodi hadi’a bee-dalan, saneamentu, espera katak ho ida ne’e bele ajuda”, nia haktuir.

Nune’e, Xefe Governu espera, ho apoia parseiru dezenvolvimentu sira bele rekupera no rekonstrui infraestratura sira ne’ebé estraga durante dezastre naturál sira.

Enkuantu, Governu halo ona mudansa boot ida hodi solusiona burokrasia sira iha setór infraestrutura nian.

“Iha tinan ne’e ami halo mudansa boot, mudansa ida mak Lei Enkuadramentu Jestaun Finanseira no Dekretu-Lei Aprovizionamentu, kontratu públiku ho infrasaun sira. Bainhira promulga tan mak pakote ida kompletu hodi ajuda iha forma transparente no responsável hodi bele halo aprovizionamentu sira di’ak,” nia dehan.

Desde tinan kotuk to’o daudaun ne’e, Governu halo ona aprovizionamentu ba infraestrutura ho valór millaun $700.

MOP identifika estragu sira durante dezastre naturál iha loron 04 abríl 2021 hamutuk 117 iha teritóriu laran tomak kompostu hosi estragu simples 40 no estragu komplexu 77, ho estimasaun kustu pur volta millaun $245.

Antes ne’e, KAFI deside rekupera imediata projetu ualu, ne’ebé hetan estragu tanba inundasaun ne’ebé akontese iha 04 abríl 2021.

Infraestrutura estrada ne’ebé konsege rekupera ona mak Embaixada Japaun oin, enkuantu seluk iha faze konkursu públiku iha CNA.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!