iklan

EKONOMIA, HEADLINE

Konservasaun internasionál entrega motorizada ba guarda-florestál parke Nino Konis Santana

Konservasaun internasionál entrega motorizada ba guarda-florestál parke Nino Konis Santana

Konservasaun Internasionál iha Timor-Leste simbolikamente entrega motorizada ba guarda-florestál parke nasionál Nino Konis Santana, Lautém, hodi fasilita serbisu kontrolu área protejida, iha resintu MAP, Caicoli, sesta (01/04). Imajen TATOLI/Francisco Sony.

DILI, 01 abril 2022 (TATOLI)—Konservasaun Internasionál iha Timor-Leste, sesta ne’e, entrega  motorizada no ekipamentu ba guarda-florestál parke nasionál Nino Konis Santana, iha munisípiu Lautém.

Diretór Konservasaun Internasionál iha Timor-Leste, Manuel Mendes. Imajen TATOLI/Francisco Sony

Diretór Konservasaun Internasionál, Manuel Mendes, hateten, ekipamentu ne’ebé ohin, entrega tanba antes ne’e iha kooperasaun ho Ministériu Agrikultura no Peska (MAP) liuhosi Diresaun Jerál Floresta, Kafé no Planta Industriál.

“Ohin ita entrega motór neen inklui ekipamentu guarda-florestál hanesan fasilidade médiku, lona, kapasete no lámpara hodi fasilita sira-nia atividade,” Diretór hateten ba Agência TATOLI, iha edifísiu MAP, Caicoli.

Notísia relevante: MAP Konserva Florestál iha Área Protejida 44 Inklui Parke Nasionál Rua

Parke nasionál Nino Konis Santana ne’e iha rai ektare 170.000, kompostu hosi suku sia maibé menus fasilidade.

“Ba oin ita sosa tan motór rua. Ami sei kontinua husu apoiu ba parseiru sira hodi kontinua ajuda iha área florestál nian tanba kondisaun sei mínimu,” nia akresenta.

Diretór Jerál Floresta, Kafé no PPlanta Indústriál, Raimundo Mau. Imajen TATOLI/Francisco Sony

Iha biban hanesan, Diretór Jerál Floresta, Kafé no Planta Indústriál, Raimundo Mau, konsidera apoiu ne’e importante tebes ba serbisu guarda-florestál hodi halo kontrola ba parke nasionál tanba durante ne’e iha komunidade balun kontinua tesi ai arbiru no fa’an animál protejidu sira.

“Daudaun ne’e Lautém iha parke nasionál neen no iha ema mak halo kontrolu. Ha’u fiar katak ho fasilidade ne’e ita-boot sira sei halo serbisu kontrolu ba fatin protejidu sira ho di’ak,” nia tenik.

Nune’e, lori Governu nia naran, Diretór Jerál hato’o agradese ba Konservasaun Internasionál no iha esperansa ba oin kontinua serbisu hamutuk hodi proteje floresta sira iha Timor-Leste.

Reprezentante Guarda-Florestál Área Protejida Parke Nasionál Nino Konis Santana, Albino Pereira. Imajen TATOLI/Francisco Sony

Iha fatin hanesan, Reprezentante Guarda-Florestál Área Protejida Parke Nasionál Nino Konis Santana, Albino Pereira, hateten, parke nasionál iha área ne’ebé luan no presiza iha fasilidade ne’ebé adekuadu nune’e bele halo kontrolu di’ak.

“Ho fasilidade hirak ne’e sei ajuda fasilita kontrolu ba movimentu ilegál sira tanba durante ne’e ami halo esforsu maibé transporte ne’ebé iha ho kondisaun ladi’ak ona,” nia dehan.

Sasán ne’ebé entrega ho kustu $15.000, hosi parseiru People  for Wild Places no The Thin Green Line hosi Austrália

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!