iklan

EDUKASAUN, HEADLINE

Kursu Desportu UNTL sei realiza graduasaun dahuluk tinan ne’e

Kursu Desportu UNTL sei realiza graduasaun dahuluk tinan ne’e

Universidade Nasionál Timor Lorosa’e (UNTL). Imajen TATOLI/Francisco Sony

DILI, 01 abril 2022 (TATOLI)–Departamentu Edukasaun Fízika Desportu, Fakuldade Edukasaun Arte Umanidade (FEAH, sigla portugés) iha Universidade Nasionál Timor-Lorosa’e (UNTL) prepara ona ninia estudante atu simu graduasaun iha tinan ne’e.

“Tinan ne’e ami iha ona estudante na’in-31 mak preparadu ona atu gradua, espera katak hafoin simu graduasaun ami bele hala’o ona prosesu tomak ba kursu ne’e tuir prosedimentu normál,” Xefe Departamentu Edukasaun Fízika Desportu, Filomeno Amaral, hateten iha salaun Universidade Orientál Timor-Lorosa’e (UNITAL), Becora, sesta ne’e.

Tuir Xefe Departamentu, FEAH eziste ona durante tinan-tolu maibé la hetan autorizasaun hosi Ministériu Ensinu Superior Siénsia no Kultura (MESSK) atu simu estudante foun no realiza graduasaun, tanba bazeia ba avaliasaun hosi Ajénsia Nasionál Avaliasaun Akreditasaun Akadémiku (ANAAA), kursu ne’e seidauk hetan akreditasaun.

“Antes ne’e ami hato’o naran estudante finalista ba Rekursu Umanu atu hetan graduasaun, maibé labele tanba MESSK bandu kursu ne’e labele iha input no output, tanba ami-nia kursu ne’e la pasa iha avaliasaun,” nia akresenta.

Notísia relevante: Seidauk Akredita, FEAH-UNTL kontinua prepara kondisaun

Maski nune’e, hafoin ANAAA halo avalaisaun iha tinan 2021, iha tinan ne’e kursu desportu hetan akreditasaun ho valór C, ne’ebé kursu Departamentu Edukasaun Fízika Desportu bele kontinua filafali ninia atividade hanesan kursu sira seluk.

Departementu kursu ne’e agora hahú prepara daudaun ona kondisaun ba prosesu inskrisaun tuir mai ne’ebé sei hahú iha tinan 2023.

Nune’e, Responsável Departementu Edukasaun Fízika Desportu garante bainhira iha avaliasaun tuir mai, bele kompete ona.

“Tanba agora daudaun ami iha dosente mestradu hamutuk na’in neen, na’in-rua kuandu fila tan hosi Portugal ami sei hamutuk na’in-ualu, kompostu hosi dosente mestradu internasionál na’in-neen no timor oan na’in-rua,” nia dehan.

Jornalista : Tomé Amado

Editora     : Julia Chatarina  

iklan
iklan

Leave a Reply

iklan
error: Content is protected !!