DILI, 01 abril 2022 (TATOLI)—Vise-Ministru Komérsiu no Indústria (MTKI), Domingos Lopes Antunes, hamutuk Prezidente Instituto Qualidade Timor-Leste, Institutu Públiku (IQTL, I.P), Rosito de Sousa Monteiro, semana ne’e, liuhosi semináriu ida, divulga knaar Institutu Kualidade ba komunidade Ermera.
Espesífiku liu knaar Institutu Kualidade hatuur iha dekretu-lei númeru 15/2021 15 setembru, alterasaun dahuluk dekretu-lei númeru 10/2008 09 abril, kona-ba estatutu IQTL, I.P.
Vise-Ministru hateten objetivu atividade ne’e hodi komunidade bele hatene knaar IQTL, ne’ebé atu garante produtu sira ne’ebé Timor-Leste importa tenke kumpre regra kualidade.
“MTKI hamosu IQTL atu implementa ita-nia sistema nasionál kualidade liuhosi sub-sistema tolu hanesan metrolojia, normalizasaun no kualifikasaun,” Vise-Ministru relata liuhosi nota ne’ebé Agência TATOLI asesu, sesta ne’e.
Notísia relevante: Tinan ne’e, IQTL-UNIDO inisia planu estabelese laboratóriu nasionál kualidade produtu
Inisiativa ne’e mosu tanba Governu konsidra kualidade hanesan fatór importante tebes tanba determina produtividade no kompetitividade entre empreza no elementu importante ida ba defeza kualidade vida ba sidadaun hotu, partikulármente ba konsumidór sira.
“Kualidade la’ós de’it responsabilidade instituisaun ida mesak nian, nia konseitu ne’e orizontál, liuhosi atividade hotu, hosi setór ekonomia no sosiedade sivíl tomak, ne’e duni dezafiu no responsabilidade ida ba ita hotu,” nia akresenta.
Nune’e, IQTL mosu hanesan entidade reguladora nasionál ba kualifikasaun normalizasaun no metrolojia, ho misaun implementa sistema nasionál kualidade no ba oin sei harii laboratóriu nasionál metrolojia.
Kualifikasaun mak hanesan atividade akreditasaun, sertifikasaun no rekoñesimentu kompeténsia no mós halo avaliasaun konformidade, enkuantu normalizasaun kona-ba produsaun norma kualidade nian no dokumentu seluk kona-ba asuntu kualidade, seluk tan mak metrolojia ne’e rasik kona-ba sasukat sasán no garante rigór no padraun unidade medida.
“Sistema nasional kualidade ne’e atu dehan institusaun relevante hotu iha área kualidade hanesan universidade públiku ka privadu, setór privadu, institusaun sira hanesan AIFAESA, no Tane Konsumidór tenke serbisu hamutuk ho IQTL atu harii ita-nia sistema nasionál kualidade,” nia dehan.
Biban hanesan, MTKI halo divulgasaun ba projeitu infraestrutura ekonomika hanesan merkadu munisípal, Kréditu Funan kiik, inklui programa Cesta bazika ne’ebé mak iha tempu badak MTKI sei lansa iha Ermera.
Seremónia ne’e partisipa hosi Prezidente Autoridade Munisípiu Ermera, Eusébio Salsinha, Diretór Servisu Munisipál, Diretór hosi liña ministeriál, Xefe Departamentu, Administradór Postu, emprezáriu no xefe suku, estudante, no konvidadu sira.
Jornalista : Arminda Fonseca
Editora : Julia Chatarina
