iklan

DESPORTU, DILI, HEADLINE

SEJD: papél mídia importante divulga informasaun iha área desportu

SEJD: papél mídia importante divulga informasaun iha área desportu

Sekretáriu Estadu Juventude no Desportu (SEJD), Abrão Saldanha hala'o enkontru ho media sira. Iha salaun SEJD, sexta (08/10). ImajenTatoli/Egas Cristovão

DILI, 01 abríl 2022 (TATOLI)— Sekretáriu Estadu Juventude no Desportu (SEJD), Abrão Saldanha, sesta ne’e, hala’o sorumutu ho Xefe Redasaun kada mídia iha Timor-Leste, hodi troka opiniaun atu halo públikasaun ba atividade Governu iha área desportivu no juventude.

Iha sorumtuk ne’e, SEJD planu kada trimestrál ida ka fulan-tolu sei halo enkontru ho media sira atu servisu hamutuk hodi fó sai informasaun ne’ebé loos ba públiku iha setór juventude no desportu.

Biban ne’e, SEJD Abrão Saldanha, hateten programa ne’e realiza atu hakbesik an liu ba Jornalista sira ne’ebé durante ne’e halo kobertura ba notísia desportu.

Sekertáriu Estadu Joventude no Desportu (SEJD), Abrão Saldanha. ImajenTatoli/Egas Cristovão

“Mídia importante tebes atu divulga sai informasaun ba públiku, ami agaradese tebes tanba ita servisu hamutuk di’ak tebes. Tanba ami bele hala’o servisu di’ak, maibé laiha ita boot (jornalista) sira nia prezensa mós públiku la hatene saida mak ami halo, entaun ho programa ida ne’e ita halo atubele fó sujestaun ba malu. Ami mós hakarak ita boot sira bele kritika ami iha saida mak durante ne’e ami halo la di’ak no ami mós bele esplika lala’ok no sistema desportu no juventude nian ba imi,” Sekretáriu Estadu Abrão hateten ba Agência TATOLI, bainhira realiza sorumutuk dahuluk ho Jornalista sira iha salaun SEJD Lecidere-Dili, sesta ne’e.

SEJD mós esplika lala’ok desportiva no orsamentu inklui ezekusaun programa no orsamentu ba Jornalista  sira ne’ebé hal’o kobertura iha área desportu atubele kumprinde sistema no lala’ok hotu desportu nian ho di’ak.

“Desportu ne’e iha buat tolu ne’ebé importante tebes no liga sira hamutuk mak sai desportu hanesan literatura fizika, atividade fizika no desportu, komponente tolu ne’e tama desportu,” nia akresenta.

Iha biban hanesan, Reprezentante Xefe Redasaun Agência Notisioza Timor-Leste TATOLI, I.P, Koordenadór kobertura Multimedia no asuntu Internasional, Rafael Belo, hala’o introdús misaun no vizaun TATOLI, I.P nian no servisu hotu ne’ebé mak TATOLI halo durante ne’e no kobertura sira iha desportu nian ba SEJD atubele hatene.

“Ami TATOLI mai ho vizaun ida ne’ebé haree ba interese Estadu ho polítika ida ne’ebé haree ba interese públiku, ho inisiativa SEJD nian ne’ebé hala’o ne’e hodi realiza enkontru regular kada fulan tolu ho mídia sira hanoin inisiativa ne’e di’ak tebes atu nune’e bele partilla informasaun ba jornalista sira atu bele públika ho dadus loloos ba públiku,” nia akresenta.

Agência TATOLI nia importansia ida atu halo kobertura másimu ba ezekusaun Orsamentu Jerál Estadu (OJE) kada tinan, ho nune’e husu atu SEJD bele koopera di’ak ho Jornalista sira atubele fó sai dadus sira ezekusaun nian ho loloos .

“Ha’u sujere ba SEJD bele fasilita informasaun sira kona-ba ezekusaun orsamentu nian atu ajuda komunidade Jornalista sira bele divulga di’ak liután, lae ita rona mak gravasaun hela de’it bele loos ou laloos tanba ita ko’alia kona-ba prinsipiu verifikasaun dalaruma ita ema ne’e bele loos ou laloos mós ne’ebé tenke reforsa ho dadus ne’ebé ho loloos atu informasaun sira mós ho loloos,” Raffy Belo sujere.

Iha reuniaun dahuluk ne’e hetan partisipasaun masimu hosi Xefe Redasaun sira hosi media hotu iha teritoriu nasionál no Jornalista ne’ebé durante ne’e hala’o kobertura iha área desportu no juventude.

Enkuantu, reprezentante mídia ne’ebé tuir sorumutuk ne’e mak hanesan, Agência TATOLI, Timor-Post, INDEPENDENTE, RTTL, EP, STL no seluk tan.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!