SEKOMS apresia servisu jornalista
DILI, 01 abril 2022 (TATOLI) – Sekretáriu Estadu Komunikasaun Sosiál (SEKOMS), Merício Juvinal dos reis ‘Akara’ apresia jornalista sira nia servisu, hahú hosi kampaña eleitorál to’o eleisaun prezidensial.
“Ho briefing ohin ne’e, atu fó apresiasaun ba servisu média ni’an, durante tempu kampaña primeira volta tanba média halo servisu di’ak no profesionál, laiha insidente no grave ruma, hanesan ema mai protesta ne’e ladun iha”, Akara hateten ba jornalista sira, hafoin hala’o briefing ho média na’in sira, iha Palácio Governo, Díli, sesta ne’e.
Akara rekorda, antes eleisaun prezidensiál volta dahuluk, SEKOMS mós halo briefing ida ho média sira, oinsa média bele kontribui ba páz no estabilidade, oinsa média bele ajuda prosesu halo edukasaun sívika atu sidadaun sira vota ho konsiénsia no oinsa média bele tulun Governu atu fó informasaun lós no kredível.
“Tanba, agora ita hotu hatene ba ronde daruak, tanba ne’e ohin ita aproveita atu fó hanoin malu fali atu mantein nafatin kode étika jornalismu ni’an, hanesan servisu tuir kode etika, professionál, imparsiál, fó informasaun loos no kredível, kontribui mós ba situasaun hakmatek, liuhosi notísia ne’ebé edukativu no kontribui ba jornalizmu dame”, revela.
Governante refere, eleisaun prezidensiál volta daruak determina Prezidente Repúblika ida ne´ebé ba povo tomak, nune´e mak media tenke hala´o nia kna´ar ho di´ak.
“Média brienfing ohin ne’e, ami iha hanoin atu hametin relasaun entre média ho Governu, tenke di’ak no tenke metin, tanba ita-nia objetivu ida de’it katak garantia liberdade imprensa ne’ebé kualidade”, konklui.
Jornalista : Nelia Fernandes
Editór : Zezito Silva
