HEADLINE, LIQUIÇÁ, MUNISÍPIU

SEKOMS lansa matadalan ba Rádiu Komunidade 16

SEKOMS lansa matadalan ba Rádiu Komunidade 16

Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, hamutuk ho entidade relevante lansa matadalan ba Rádiu Komunidade hamutuk 16, iha Rádiu Komunidade Tokodede iha suku Dato, Liquiçá, sesta (01/04). Imajen/SEKOMS

LIQUIÇÁ, 01 abríl 2022 (TATOLI)–Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, sesta ne’e, lansa ona livru matadalan atu ajuda serbisu jornalista sira iha Rádiu Komunidade 16 iha territóriu nasionál.

Lansamentu ne’e hala’o simbólikamente iha Rádiu Komunidade Tokodede, iha suku Dato, postu administraticu Liquiçá, munisípiu Liquiçá, no sei kontinua distribui ba rádiu komunidade seluk.

“Ha’u husu ba diresaun sira atu ajuda monta mós livru matadalan ne’e iha plataforma online, tanba giaun ne’e la’ós dokumentu segredu ida atu subar fali. Tenke fasilita jornalista sira hodi sira bele hatene didi’ak sira-nia knaar loloos,” Sekretáriu Estadu Akara hateten iha Rádiu Komunidade Tokodede, iha suku Dato.

Notísia relevante: CNC atribui prémiu ba jestór rádiu komunidade 15 iha Timor-Leste

Governante ne’e konsidera, matadalan ne’e importante mós ba Jestór, Diretór, Prezidente no Konsellu sira.

“Bainhira dirijente sira atu fó orientasaun ba ninia jornalista sira iha Rádiu Komunidade tenke tuir giaun ne’e, labele fó orientasaun fora hosi giaun, se lae orsida bele mosu konfuzaun,” nia akresenta.

Sekretáriu Estadu refere ba serbisu Ministériu Asuntu Parlamentár no Komunikasaun Sosiál (MAPKOMS) no SEKOMS hanesan interligadu, la’ós ketak-ketak.

“Bainhira serbisu ida maka susesu iha diresaun ida nia laran ne’e hanesan susesu ministériu nian, tanba ne’e presiza kolabora ba malu, kuandu iha dokumentu importante kona-ba dezenvolvimentu Rádiu Komunidade sira tenke, distribui ba malu, se diretór ida la hatene diretór seluk ninia serbisu, difísil atu fó apoiu ba malu. Ho nune’e, ha’u hakarak apresia ba ekipa ne’ebé mak halo livru giaun ne’e tanba ho sira-nia serbisu maka’as mak bele konsege finaliza giaun ne’e,” nia tenik.

Antes ne’e, ekipa hosi SEKOMS prodús ona matadalan atu apoiu serbisu Rádiu Komunidade maibé jerál de’it, nune’e ho planu no polítika mak konsege atualiza matadalan ne’e hodi sai espésifiku liután.

“Aban bainrua karik ita la kaer ona Governu, governasaun tuir mai bele uza de’it ona matadalan sira ne’e, tanba ami polítika ne’e troka malu,” Akara salienta.

Biban hanesan, Xefe Gabinete MAPKOMS, Francisco Ximenes, apresia ho serbisu no esforsu SEKOMS tanba konsege prodús duni giaun ida ba jornalista Rádiu Komunidade no konsidera kriasaun giaun ne’e bele ajuda liután meiu komunikasaun ne’e di’ak liután iha serbisu tuir knaar loloos atu labele hetan krítika iha futuru.

“Daudaun ne’e mundu tama ona iha era teknolojia, tanba ne’e Radiu Komunidade sira mós presiza hadi’a sira-nia an hodi bele kompete iha prosesu divulgasaun informasaun ba komunidade,” governante ne’e fó hanoin.

Diretór Diresaun Nasionál Promosaun Dezenvolvimentu Media Lokál (DNPDML), Jose da Costa, informa katak karakterístika Rádiu Komunidade ne’e harii hosi komunidade no mai hosi komunidade.

“Tenke foti asaun ne’ebé komunidade sira enfrenta tanba komparasaun Rádiu Komunidade la hanesan ho mídia públika sira. Jornalista sira iha Rádiu Komunidade sira tenke obedese nafatin ba giaun ne’ebé prodús ona, nune’e bainhira ba foti informasaun iha komunidade karik tenke banati tuir kultura no tradisaun ne’ebé sira hasoru,” nia akresenta.

Rádiu Komunidade nu’udar meiu ida hosi SEKOMS atu fasilita hasa’e kualidade informasaun ne’ebé rádiu sira fó sai, hodi fasilita komunikasaun entre povu kada munisípiu ho Governu sentrál, hanesan hato’o preokupasaun no halo promosaun no hato’o kondisaun suku.

Kada tinan SEKOMS oferese fundu ba Rádiu Komunidade implementa programa hanesan produsaun notísia lokál, notísia online, produsaun Talk Show, produsaun teatru ka drama no produsaun mensajen badak sira.

Rádiu Komunidade 16 ne’ebé eziste maka Tokodede Liquiçá, Rádiu Komunidade Comoro, Cova Taroman Suai, Atoni Lifau Oé-cusse, Vox Populi Lospalos, Mauloko Maubisse, Manukoko Ataúro, Ili-Wai Manatuto, 1912 Same, Lian Matebian Baucau, Kolelemai Sahe Bucoli, Rai-Husar Aileu, Povu Viqueque, Kafe Ermera, Lian Tatamailau Ainaro, no Rádiu Komunidade Maliana.

Iha maiu 2020, SEKOMS lansa Rádiu Komunidade 14 streaming online hanesan  Rádiu Komunidade Liquiça ho nia sítiu (www.radiotokodede.org), Rádiu Komunidade Lospalos (www.radiolospalosvoxpopuly.org), Rádiu Komunidade Comoro, Dili, (www.radiocomoro.org), Rádiu Komunidade  Oe-Cusse (www.radioatonilifau.org), Rádiu Komunidade Ermera (www.radio-cafe.org), (www.rcc.tl), Rádiu Komunidade  Manufahi  (www.radio1912.org), Rádiu Komunidade  Manatuto, (www.radioiliwai.org), Rádiu Komunidade Baucau (www.radiomatebian.org), Rádiu Komunidade Maliana (www.radiomaliana.org), Rádiu Komunidade Maubise-Ainaro (www.radiomauloko.org), Rádiu Komunidade Viqueque (www.radiopovuviqueque.org), Rádiu Komunidade Aileu (www.radiohusar.org), no Radiu Komunidade Bucoli-Baucau (www.sahebucoli.org).

Jornalista : Tomé Amado

Editora     : Julia Chatarina

iklan
iklan

Leave a Reply

iklan
error: Content is protected !!