DILI, 01 abríl 2022 (TATOLI)—Prezidente Partidu Libertasaun Populár (PLP) no atuál Primeiru-Ministru (PM), Taur Matan Ruak, hakarak asegura koligasaun ho Partidu Frente Revolucionária do Timor-Leste Independente (FRETILIN) forma Governu liu mandatu tinan 2023.
“Onra boot ida ba ha’u-nia Partidu PLP hola parte iha koligasaun ho Partidu FRETILIN ne’ebé Prezidente Repúblika atuál no Kandidatu Prezidente Repúblika (PR) ba segunda volta, Francisco Guterres ‘Lu Olo’ mós hola parte, entaun koligasaun ida-ne’e iha projetu boot ida maibé fahe ba faze rua, objetivu dahuluk mak agora ami hakarak serbisu hamutuk ida di’ak hodi bele estende liu tinan 2023,” Taur Matan Ruak deklara liuhosi konferénsia imprensa iha Rezidénsia Metiaut, sesta ne’e.
Nia konsidera, estabilidade polítika no governativa ne’e kondisaun fundamentál ba dezenvolvimentu nasaun nian.
“Ita laiha ona tempu atu la’o, liliu ita-nia joven sira lakon sira-nia tempu barak, entaun presiza halo dezenvolvimentu atu kria oportunidade tantu sidadaun sira foho no iha sidade sira bele aproveita oportunidade sira hodi dezenvolve sira-nia-an, família no bele fó kontribuisaun ba dezenvolvimentu ita-nia nasaun, tanba ne’e ami-nia projetu tinan 2023 aseguradu,” Taur afirma.
Notísia relevante: Partidu tolu apoiu Lú Olo iha eleisaun segunda volta
Nune’e, Prezidente PLP hakarak fó apoiu tomak ba kandidatura Lú Olo ho númeru sorteiu 02, iha Eleisaun Prezidensiál segunda volta no promete sei suspende kuadru PLP bainhira la fó apoiu.
“Ha’u fiar katak hotu-hotu apiou Lú Olo, militante ha’u la ko’alia maibé sira ne’ebé kuadru mak la apoia, ha’u sei suspende sira, ne’e ha’u-nia posizaun,” Taur deklara.
Nia dehan, razaun fó apoiu ba Lú Olo tanba haree ba personalidade ne’ebé iha kondisaun hodi serbisu ho koligasaun, ema ida pesiénsia, nonok no ema ida la simu provokasaun no konsentra loos ba atividade.
“Durante ne’e, ha’u hanesan Primeiru-Ministru laiha razaun keixa, nia koopera hotu no dalaruma ha’u hanoin filafali, uluk ha’u Prezidente Repúblika halo buat barak maibé balun mós ha’u to’os loos ho Governu, maibé nia (Lú Olo) lae, ha’u hanoin ne’e kualidade ida ha’u rejista ho forma ida orgullozu loos, entaun nia merese ha’u-nia apoiu tanba ne’e ha’u rasik ho ha’u-nia partidu no koligasaun tomak ami deside katak tenki ajuda no apoia Lú Olo iha segunda volta,” nia tenik.
Maski nune’e, Taur hamutuk ho nia aliadu sira konsiente katak hakat ba segunda volta ne’e iha númeru desporposaun boot ba kandidatura José Ramos Horta nian ho 301.481 (46,58%), enkuantu Francisco Guterres ‘Lú Olo’ ho 143.408 (22,16%) hosi totál votu válidu hamutuk 647.172 iha territóriu tomak, maibé nafatin otimista.
“Ami-nia esperiénsia hatudu katak buat hotu só manan bainhira o luta,” nia tenik.
Biban ne’e, atuál PM haktuir, nia parte la partisipa kampaña primeira volta tanba atraza iha desizaun.
“Razaun dahuluk mak imposível manán iha primeira volta kuandu kandidatu barak, razaun daruak mak imposível ha’u-nia partidu apoiu kandidatu ida kuandu ha’u-nia kaben mós avansa, entaun nia (Isabel da Costa Ferreira) lakohi partidu apoiu nia no hakarak ba independente, razaun seluk mak ami (PLP) atraza loos entaun desizaun atraza, kuandu ami atu halo desizaun ami-nia militante barak apoiu tiha ona, ne’ebé ami fó livre ba militante sira apoia kandidatu hotu menus kandidatu Ramos Horta,” Taur dehan.
La apoiu Horta tanba hakarak disolve Parlamentu
Razaun PLP la fó apoiu ba José Ramos Horta tanba bainhira avansa hakat ba eleisaun, nia iha ona kompromisu ho Partidu Congresso Nacional de Reconstrução de Timorense (CNRT), bainhira nia manán iha eleisaun sai Prezidente Repúblika, sei disolve Parlamentu Nasionál.
“Signifika disolve Parlamentu katak hatún Governu, imposivel nia hatun ha’u, ha’u ba apoia ba-nia, di’ak liu ha’u ba luta to’o tun do que ha’u ba hakneak ba-nia. Atu dehan ami-nia kandidatu (Lú Olo) di’ak liu,” Xefe Governu salienta.
Notísia relevante: CNRT deside kandidata Horta kompete iha Eleisaun Prezidensiál períodu 2022-2027
Biban ne’e, Taur Matan Ruak husu ba Kandidatu PR ho ekipa sira atu durante kampaña labele insulta malu maibé tenki hato’o programa.
“Ba kandidatu sira no mós akompañante sira iha kampaña ko’alia mak programa no lalika insulta. Ba populasaun, husu atu kontribui ba pás no husu partisipa iha eleisaun hodi aumenta taxa partisipasaun,” nia apela.
Antes ne’e, Xefe Governu deside ona hodi foti lisensa hodi partisipa iha kampaña eleitorál hodi apoia kandidatura Francisco Guterres ‘Lú Olo’, hahú hosi loron 02 to’o ramata atividade kampaña.
VIII Governu Konstituisionál daudaun ne’e forma hosi PLP, FRETILIN no Kmanek Haburas Unidade Nasional Timor Oan (KHUNTO), iha programa ne’ebé nu’udar instrumentu polítiku ba tinan lima, ne’ebé reflete aspirasaun povu timor-oan no fó sai medida prioritária sira ba dezenvolvimentu sustentável, hanesan define ona iha ‘Planu Estratégiku Dezenvolvimentu 2011-2030’.
ha loron 21 marsu 2020, Sekretariu Jerál FRETILIN, Marí Alkatiri no Prezidente PLP atuál Primeiru-Ministru VIII Governu Konstitusionál, Taur Matan Ruak, asina plataforma entendimentu entre partidu rua hodi mantein Taur hanesan Xefe Governu to’o termina mandatu iha tinan 2023 no la konkorda Eleisaun Antesipada.
Nune’e Prezidente Repúblika, Francisco Guterres ‘Lú Olo’ promulga Orsamentu Jerál Esttadu (OJE) 2020 iha loron 19 outubru 2020.
Jornalista : Antónia Gusmão
Editora : Julia Chatarina
