iklan

EDUKASAUN, HEADLINE

Eskola EBC 30 Agostu Comoro hahú implementa projetu komunitáriu

Eskola EBC 30 Agostu Comoro hahú implementa projetu komunitáriu

Diretór Ensinu Báziku (EBC) 30 agostu, Comoro, Dili, Filomeno Salsinha. Imajen Tatoli/Felicidade Ximenes

DILI, 04 abril 2022 (TATOLI)–Diretór Eskola Ensinu Báziku Sentrál (EBC, sigla portugés) 30 Agostu iha Comoro, Filomeno Salsinha, hateten, eskola ne’e hahú implementa programa projetu komunitáriu ba reabilitasaun edifísiu rua.

“Ita hetan projetu komunitáriu ne’ebé Ministériu Edukasaun Juventude no Desportu (MEJD) atribui mai ita, iha edifísiu rua ho sala aula ualu maka tama reabilitasaun. Daudaun ne’e ita-nia prosesu atinje ona 25% tanba sala lima taka ona kalen no monta ona janela ho odamatan, sei falta sala tolu mak seidauk,” Diretór eskola informa ba Agência TATOLI, iha ninia knaar fatin, Comoro, segunda ne’e.

Notísia relevante: Eskola 197 asina ona kontratu projetu komunitáriu hadi’a eskola

Tuir nia, sala lima falta tan de’it foru no monta azuleju, ne’ebé parte eskola iha ona konfiansa katak molok to’o fulan-neen prosesu reabilitasaun ne’e sei konklui ona.

Kustu ba projetu hosi MEJD ho montante $36.700 resin, ho durasaun implementasaun ba fulan-neen, hahú hosi fevereiru to’o jullu.

“Tanba ne’e, hosi prosesu reabilitasaun tenke kumpre prosedimentu ne’ebé ministériu hatúr ona, katak kada prosesu tenke atinje to’o 25% hafoin aprezenta tiha relatóriu maka foin bele foti fali 25% iha faze daruak, kuandu laiha relatóriu sei la hetan direitu atu foti tan,” nia akresenta.

Totál projetu komunitáriu ba eskola iha munisípiu Dili hamutuk 16, ho sala aula 64 ho ninia kustu hamutuk $1.680.680,12.

Aleinde ne’e, kustu jerál ba prosesu konstrusaun no reabilitasaun eskola 197 ho sala aula 651 iha territóriu nasionál hamutuk $20.274.586,97.

Jornalista : Tomé Amado      

Editora     : Julia Chatarina

iklan
iklan

Leave a Reply

iklan
error: Content is protected !!