DILI, 04 abril 2022 (TATOLI)—Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, informa rezultadu avaliasaun hosi ekipa SEKOMS identifika katak peograma “Naroman ba Suku” iha suku tolu la ativu.
Notísia Relevante : SEKOMS hein rezultadu avaliasaun fó apoio ba “Programa Naroman ba Suku”
“Tuir rezultadu avaliasaun ba programa naroman ba suku ne’e, iha suku tolu mak la ativu, hanesan suku Leohitu iha Balibo, Batu Manu no Suku liurai iha Aileu,” Merício Juvinal dos Reis ‘Akara’ hateten ba Agência Tatoli, iha resintu Parlamentu Nasionál (PN), Dili, segunda ne’e.
Suku tolu ne’ebé la ativu ba programa “Naroman ba Suku” tanba ema-ne’ebé jere programa iha suku ne’e nia ba fali fatin seluk, no hetan fali servisu seluk hodi la fó atensaun ona ba programa ne’e.
“Problema seluk mak ema ne’e muda tiha, la halo nia relatóriu. Entaun, problema tékniku hanesan ne’e mak sei difikulta atu ita kontinua apoia sira. Tanba, ita sei la kontinua apoia, bainhira sira jestaun la di’ak no relatóriu laiha. Maibé ba ida-ne’ebé nia programa la’o di’ak ita kontinua fó apoia,” nia dehan.
Nune’e mós, ba suku seluk kuandu loron ruma nia programa la funsiona mak SEKOMS sei hapara hodi fó fali ba suku seluk ne’ebé mak prontu no hakarak liu, hanesan suku Rotutu, Haekoni iha Baguia no Apitini iha Lospalos no suku Seloi Kraik iha Aileu, sira prontu ba programa “Naroman ba Suku” ne’e.
Programa Naroman ba Suku ne’e estebelese bazea ba pedidu ne’ebé suku sira fó mai, tanba sira mak uluk hakarak atu SEKOMS loke sentru informasaun iha suku hodi habelar informasaun ba sidadaun sira.
Hosi programa ne’e, nia dehan, sira bele promove sira-nia poténsia iha suku laran, hanesan promove poténsia turistiku, poténsia istóriku, poténsia kulturál no poténsia hirak seluk tán.
“Tanba ne’e, ha’u-nia mensajen katak sei ita mak hato’o pedidu ita tenke sente pertense ba projetu ne’e. Tanba, Governu atu kontinua apoia ka la kontinua ne’e depende ba estrutura no depende ba Autoridade iha ne’ebá, tanba Governu hanesan suporta de’it maibé estrutura ne’ebá la funsioná ita atu apoia oinsá,” nia dehan.
Jornalista : Nelia Fernandes
Editór : Cancio Ximenes
