COVALIMA, 06 Abril 2022 (TATOLI)—Australia Pacific Training Coalition (APTC) ne’ebé parseria ho Sekretáriu Estadu Profisionál no Empregu (SEFOPE) fó kapasitasaun ba formadór sira iha sentru formasaun ne’ebé akreditadu iha munisípiu Covalima.
“Formasaun ne’e mai hosi parseiru importante SEFOPE bolu naran APTC fó formasaun ba iha formadór ho nia jerente no funsionáriu sira iha sentru formasaun akreditadu ne’ebé eziste iha munisípiu Covalima,” Diretór SEPFOPE Munisípiu Covalima, Augusto Assis Gomes, hateten ba jornalista sira, iha salaun postu administrativu Suai Vila, aldeia Taboko Loot, kuarta ne’e.
Objetivu hosi formasaun ne’e, atu dezenvolve formadór sira-nia kapasidade atu halo proposta no halo jestaun ba sira-nia atividade hodi realiza sira-nia programa sira.
APTC fó formasaun ba formadór no jerente sira hala’o durante loron rua ne’ebé ba loron dahuluk formadór no jerente sira aprende matéria kona-ba jestaun no halo proposta ba programa no atividade ne’ebé mak atu realiza.
Formasaun ba loron daruak foku ba kandidatu trabaldór Seasonal Worker hamutuk na’in-50 ne’ebé prepara atu ba Austrália ne’e, sira presiza iha abilidade kona-ba entrevista.
Formasaun ne’e partisipa hosi formadór Sentru Treinamentu Vokasionál, Centru Vokasionál Klaret Salele, Centro Comunidade Covalima (CCC) no Centru SKA Mosu Morin Suai.
Jornalista : Celestina Teles
Editór : Cancio Ximenes
