DILI, 06 abril 2022 (TATOLI)—Bee Timor-Leste, Empreza Públika (BTL, E.P), kuarta ne’e, realiza seremónia selebra kontratu ho kompañia Lia-lura Unipessoál, Lda, hodi halo konstrusaun sistema bee-moos iha suku Bualale, postu administrativu Quelicai, munisípiu Baucau.
“Ohin ita selebra kontratu ho kompañia Lia-lura atu realiza serbisu konstrusaun fízika sistema bee-moos ba ita-nia komunidade iha suku Bualale, ho orsamentu $230.237,22,” Prezidente Konsellu Administrasaun BTL, E.P, Carlos Peloi dos Reis, hateten, iha salaun edifísiu sentrál BTL, E.P, Caicoli.
Sitema konstrusaun bee-moos ne’e sei benefisia ba família uma-kain 62 no populasaun hamutuk 434, inklui ba maluk ho defisiente hamutuk 12.
“Durasaun serbisu ba projetu ne’e fulan-neen, hahú hosi loron 20 abril to’o 20 outubru. Espera kompañia halo esforsu maka’as nune’e bele ramata tuir loron ne’ebé determina ona hodi komunidade bele konsumu ona bee-moos,” nia akresenta.
Notísia relevante: MF sei negosia ho Banku Mundiál finansia projetu fornesimentu bee-moos
Durante konstrusaun sistema bee-mos mak identifika kompañia la halo tuir kontratu serbisu ne’ebé iha mak sei hetan penalidade hanesan ko’a orsamentu.
Iha fatin hanesan, Na’in ba kompañia Lia-lura unipessoál Lda, Gabriela da Conceição, hateten, semana oin ekipa hahú tuun ona terrenu hodi halo peskiza ba fatin hodi prepara sasán.
“Ita sei halo esforu maka’as nune’e bele konklui tuir kontratu ne’ebé iha,” nia dehan.
Suku Bualale iha aldeia rua hanesan Osso-mesa no Lia-lura, ho totál uma-kain 230 ho totál populasaun 889.
Jornalista : Arminda Fonseca
Editora : Julia Chatarina
