DILI, 06 abril 2022 (TATOLI)— Espesialista Komisaun Anti Korrupsaun (CAC,sigla Portugés), kuarta ne’e, halo diseminasaun rejime deklarasaun bens no interese ho baze Lei Medida Prevensaun no Kombate Korrupsaun (MPCC, sigla portugés), ba kargu Xefia no ofisiál aprovizionamentu Agência TATOLI, I.P.
Biban ne’e, Espesialista CAC, Belito Marçal, hateten prezensa ekipa KAK nian mai iha edifisiu TATOLI, I.P ne’e, atu partilla ba dirijente TATOLI sira kona-ba maneira oinsá atu prenxe formulariu online ba deklasaun riku-soin nian.
“Ami mai esplika ka disemina ba dirijente Agência TATOLI, I.P atu nune’e aban bainrua sira prenxe formulariu deklarasaun ba riku-soin labele hetan problema,” Espesialista CAC ne’e hateten iha salaun Borja da Costa, Faról.
Notísia relevante: PR Lú-Olo deklara ona rikusoin ba Tribunál Rekursu
Tanba aprezentasaun deklasaun riku-soin ne’e nia prazu durante loron 30, kundu iha loron ne’e nia laran maka kargu xefia sira seidauk deklara bens no interese sei hetan sansaun tuir lei Medida Prevensaun no Kombate Korupsaun númeru 7/2020.
Iha artigu 48 hateten bainhira deklarante sira prenxe formuláriu online ba bens no interese tarde sei hetan sansaun ho koima ida korresponde 25% hosi valór salariu mensal.
Iha fatin hanesan, Prezidente Konsellu Diretiva Agência TATOLI, I.P, Manuel Pinto, agradese ba espesialista CAC ne’ebé disemina prosesu ka maneira atu prenxe formuláriu deklarasaun bens no interese liuhosi plataforma online.
“Ita bo’ot sira sira nian prezensa bele ajuda ami hodi kompleta prosesu sira ne’e,” Prezidente Konsellu Diretiva agradese.
Hafoin Lei Medida Prevensaun no Kombate Korrupsaun (MPCC, sigla portugés) ho artigu hamutuk 117, tama ein vigór no kompleta ona loron 180, iha loron 22 fevereiru 2021, maka ekipa hosi CAC hahú halo diseminasaun ba ajente públiku, liuliu kargu xefia sira.
Lei MPCC iha artigu 29 to’o 30 ne’e fó obrigatóriu ba iha ajente públiku sira ne’ebé kaer hela kargu polítiku no kargu xefia iha funsaun públika iha instituisaun Estadu, diretór nasionál to’o mai xefe departamentu iha obrigasaun atubele aprezenta sira-nia deklarasaun bens no interese.
Funsionáriu Estadu ne’ebé asume kargu xefia sei deklara sira-nia rikusoin inklui sira-nia família ba CAC bainhira lei ne’e hahú implementa.
Iha kapítulu II Rejime Deklarasaun Bens no Interese, artigu 28 obriga kualkér sidadaun ne’ebé asume karu públiku tenke deklara rikusoin.
Natureza hosi artigu ne’e ko’alia kona-ba ema sira ne’ebé atu halo deklarasaun, hanesan sira ne’e asume kargu polítika, deskrisaun ne’e mai to’o xefe departamentu no funsionáriu sira ne’ebé la’ós okupa kargu xefia, maibé pertense ba área sira konsidera altu risku ba korrupsaun.
Nune’e mós, ba funsionáriu sira ne’ebé iha área serbisu hanesan impostu, aprovizionamentu ba kontratu públiku, jestaun rai ho inspesaun tenke halo deklarasaun.
Notísia relevante: Kargu Xefia iha instituisaun Estadu na’in-365 deklara ona Rikusoin
Jornalista: Natalino Costa
Editór : Florencio Miranda Ximenes
