BAUCAU, 06 abríl 2022 (TATOLI) – Estudante na’in-250 hosi Eskola Sekundária Públiku númeru 1 Baucau (ESP), kuarta ne’e, tuir formasaun edukasaun sívika kona-ba dereitu umanu sidadania liga ba violénsia bazea ba jéneru hosi Uma Paz Baucau.
Diretora Ezekutiva Fundasaun Uma Paz Baucau, Felismina Belo esplika, tópiku importante rua mak fahe ba estudante sira hanesan violénsia bazea ba jéneru no salva guarda nune’e estudante sira bele kuida aan hosi ameasa violénsia hotu-hotu hodi utrapasa no atiniji sira-nia mehi iha futuru.
“Hosi formasaun ne’e, sira bele iha koñesementu tipu violénsia nune’e bainhira hasoru kauza sira-ne’e bele keixa ba iha Polísia, Uma Mahon, Ministériu Solidaridade Sosial,” Diretora Uma Paz Baucau hateten iha Sentru Konvensaun Baucau (CCB, sigla Portugés), Vila Antiga.
Uma Paz Baucau rejista kazu violénsia bazea ba jéneru hamutuk 178 kompostu tinan 2020 hamutuk kazu 80-resin no tinan 2021 hamutuk 96 ne’ebé pursentu 75 hosi labarik ki’ik ne’ebé akontese iha fatin aprendizajen, insestu, problema família no violasaun seksuál inklui fíziku entre labarik ho labarik.
Edukasaun sívika ne’e realiza tanba bazea ba akontesimentu iha tinan 2020-2021 ne’ebé maioria vítima hosi estudante sira nune’e liuhosi formasaun refere bele fó hanoin ba estudante sira atu oinsá antesipa, koñese tipu violénsia bazea ba jéneru inklui fó prioridade ba estudu durante prosesu aprendizajen.
“Feto mak barak liu sai vítima ba violénsia bazea ba jéneru liuliu violasaun seksuál, doméstika no fiziku,” nia akresenta.
Kazu hirak ne’e, Uma Paz fó asistensia legál ne’ebé autór balun iha ona prizaun, balun sei prosesu iha tribunál no balun sei prosesu investigasaun iha Ministériu Públiku.
Diretór ESP númeru 1 Baucau, Paul Diaz Menezes konsidera parte dirijente rejista kazu violénsia fíziku entre estudante sira nune’e formasaun refere importante tanba bele minimiza konflitu entre estudante sira.
Jornalista : Natalino Belo
Editór : Evaristo Soares Martins
