DILI, 06 abril 2022 (TATOLI)—Ministru Asuntu Parlamentar no Komunikasaun Sosiál (MAPKOMS) interinu no Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, informa MAPKOMS no SEKOMS sei estabelese mídia munisípiu iha territóriu nasionál.
“Ita konsege diversifika meiu komunikasaun konvensionál ba dijitál, plataforma dijitál sira agora ita dezenvolve makaas no ba oin iha nível munisípiu ita sei iha mídia munisípiu atu ajuda prevene dependensisia totál ba mídia nasionál. Tanba ita hatene rekursu ita-nia uitoan, ita tenke lori mídia to’o munisípiu ne’e kustu boot, ne’ebé prosesu la’o ona, ita sei estabelese mídia munisípiu ho plataforma oioin,” Merício Juvinal dos Reis ‘Akara’ hateten lia hirak ne’e, iha ámbitu meet press, ne’ebé hala’o iha resintu Palásiu Governu, Dili, kuarta ne’e.
Hosi ne’e, mídia konvesionál sira sei iha biro ida-idak hanesan Ajénsia TATOLI no Rádiu Televizasaun Timor-Leste (RTTL) sira nia biru iha ne’ebá, sai hanesan one man-one team hodi prodús notisia.
“Durante ne’e ita reforsa sira atu munisípiu hotu-hotu labele depende de’it ba jornalista sentrál, sira bele halo liuhosi mídia dijitál hodi transmite mai ita lansa iha ne’e. Ne’ebé, ida-ne’e mak ita halo no hosi ne’e mós ita sei apoia Autoridade Munisípiu sira atu sira iha mídia munisípiu rasik, nune’e sira ba halo kobertura no transmite mai ita lansa,” Governante ne’e hateten.
Diretór Nasionál Promosaun Dezenvolvimentu Média Lokál, Jose da Costa, hateten, polítika ne’e relevante loos ho dirasaun nia naran liga ba diverfikasaun komunikasaun sosiál iha Timor-Leste, tanba ne’e hamosu programa ida ho naran mídia munisipál.
“Mídia munisipál la’ós ita atu harii tan mídia ruma, maibé ita kria kondisaun ba mídia sira hotu-hotu atu sira konsentra iha ne’ebá sai hanesan sentru mídia ida ho plataforma oioin ne’ebé sira halo servisu iha fatin ne’ebé ita kria. Entaun ida-ne’e hanesan divizaun ida hosi MAPKOMS, ne’ebé aban bainrua integra iha munisípiu no munisípiu mak halo supervizasaun. Ita só halo akonpañamentu ba formasaun no téknika ruma,” nia dehan.
Jornalista : Nelia Fernandes
Editór : Cancio Ximenes
