COVALIMA, 06 abríl 2022 (TATOLI)—Uniaun Nasionál Juventude Maubere (UNIJMA) ka Ativista Pro Repúblika Demokrátika Timor-Leste (RDTL), CPD-RDTL/FRETILIN Movimentu Setór III, deside apoia kandidatu Prezidente Repúblika períodu 2022-2027, Francisco Guterres ‘Lú Olo’, iha eleisaun prezidensiál segunda volta ne’ebé tuir planu sei realiza iha 19 marsu 2022.
Notísia Relevante: UNIJMA apoia Lú Olo iha eleisaun prezidensiál volta daruak
“Ha’u nu’udar komisariu politíku iha setór III alerta ba membru sira-ne’ebé envolve iha organizasaun UNIJMA-ativista Pro RDTL liu-liu ema-ne’ebé ho idade 17 ba leten hakarak ka lakohi tenke apoiu ba kandidatu Prezidente Repúblika Francisco Guterres Lú-olo liuhosi apoiu vota iha eleisaun segunda volta,” Portavós UNIJMA Ativista Pro-RDTL Covalima, Rosalino Cardoso, deklara liuhosi konferensia imprensa, iha suku Matai, postu administrativu Maucatar, kuarta ne’e.
Apoiu ne’e ho intensaun atu fó vitória lori kandidatu ho númeru sorteiu rua (2) ne’e, atu reeleitu fali ba prezidente repúblika ba periodu 2022-2027 tenke servisu hamutuk hodi halo esplikasaun programa ho klaru iha baze.
“Mai ita ida de’it tanba úniku FRETILIN mak moris iha Timor-Leste hodi liberta patria no liverta povu. Se ita lori kandidatu Francisco Guterres Lú-olo ba iha Palásiu Prezidensiál Bairru Pite mak iha tinan 2023 ne’e sei hetan dezenvolvimentu iha ita nia rai-laran,” nia dehan.
Atu lori dala ida tan kandidatu Prezidente Repúblika hosi FRETILIN ne’e ba Bairru Pite, ema hotu tenke hala’o servisu makaas hahú iha baze hodi halo esplikasaun politika ba povu hodi labele lori propaganda falsu sira, nune’e tenke kaer metin FRETILIN.
“Ha’u-nia mensajen ba imi liuhosi ita-nian, tama sai uma, ita prontu atu la’o hamutuk. Se ita la hamutuk, ha’u hanoin susar tebes. Tanba iha rejiaun Covalima ne’e iha sentru 32, ita presiza koopera malu hodi fó vitoria ba kandidatu Prezidente Republiku Lú Olo atu bele manan,” nia hateten.
Iha sorin seluk, Adjuntu Sekretáriu Jerál FRETILIN Flavio Maria Guterres da Silva hateten, organizaun Unisma Pro RDTL tenke servisu hamutuk luta liberta povu, hodi hasai povu hosi nakukun.
“Ita hamutuk halo servisu luta dala ida tan hodi hasoru lia-anin atu liberta povu ho loloos hasai povu hosi nakukun. Bainhira povu esklaresidu, ema seluk labele manipula ona tenke servisu makaas hodi hasai povu hosi nakukun laran,” nia dehan.
Tanba, nia esplika, povu nia direitu sivíku entaun povu tenke ezerse sira-nia direitu votu hanesan povu ne’e tenke hatene loloos dalan ne’ebé di’akliu ba povu.
Enkuantu bazea ba kalendáriu ne’ebé fó sai hosi Komisaun Nasionál Eleisaun (CNE-Sigla Portugés), kandidatu prezidente Repúblika sira hahú realiza kampañia eleitorál ba eleisaun segundu volta iha loron 2 fulan-abríl ne’ebé sei ramata iha loron 13 fulan-abríl tinan ne’e.
Jornalista : Celestina Teles
Editór : Cancio Ximenes
