DILI, 06 abril 2022 (TATOLI)–Kandidatu Prezidente Repúblika (PR) hosi Partidu Congresso Nacional de Reconstução de Timor (CNRT) períodu 2022-2027, ho númeru sorteiu 01, José Ramos Horta, hateten bainhira eleitu sei koopera ho Governu no Parlamentu Nasionál hodi hadi’a kondisaun merkadu Manleu.
Durante kampaña prezidensiál segunda volta iha loron dalimak, Horta nota katak merkadu la favorável atu negosiante sira bele utiliza fa’an sasán.
“Baibain ha’u mai merkadu ne’e vizita, sosa modo no ai-fuan, entaun agora aproveita halo kampaña door to door, ha’u haree negosiante sira-nia kondisaun, ne’ebé tinan mai tenki haree didi’ak halo merkadu ho kualidade di’ak, haree kondisaun saneamentu no saúde públika tanba merkadu barak nune’e, iha ema barak maka laiha saneamentu loron-loron, laiha ijiene maka dala ruma bele hamosu moras oioin,” Horta hato’o kompromisu polítiku, durante kampaña iha merkadu Manleu, kuarta ne’e.
Notísia relevante: Ahi han keoske 40 resin iha merkadu Manleuana
Nia mós haree katak presiza iha kondisaun seguransa no kontrola ligasaun liña eletrisidade, tanba iha merkadu sira fasil tebes mosu sirkuitu hodi negosiante sira lakon buat hotu.
Kandidatu PR ne’e dehan, la’ós de’it merkadu Manleu, maibé tenki haree kondisaun merkadu sira iha territóriu tomak, nune’e bele fasilita negosiante kiik sira, tanba iha merkadu balun, negosiante sira fa’an sasán no modo iha estrada ninin no udan-laran.
“Ha’u promete buka maneira oioin, hamutuk ho Governu no Parlamentu inklui parseiru internasionál ruma hodi apoia hadi’a merkadu sira, tanba dala ruma mós Governu iha ezijénsia barak tebes, buat hotu tenki halo no dala ruma orsamentu la to’o. Tanba ne’e mak ita iha parseiru internasionál, entaun ha’u sei haree hodi halo merkadu simples maibé ho kualidade inklui kedas ho sintina, no armajen kiik,” Horta promete.
Eis Prezidente Repúblika ne’e promete mós sei fó subsídiu transporte ba negosiante sira hodi lori sira-nia produtu to’o iha merkadu, nune’e osan ne’ebé sira hetan hosi fa’an produtu lori kompleta ba uma.
“Sira-nia preokupasaun maka laiha osan, sasán balun folin boot, ne’ebé halo sira susar tebes sosa tanba sira sosa sasán no modo sira ne’e mai mak fa’an filafali. Sira komersiante simples, entaun sira mós presiza han no hemu, presiza sosa foos, enkuantu sasán hotu folin sa’e,” nia tenik.
Notísia relevante: Horta promete komunika ho parseiru internasionál kria empregu ba joven
Iha biban hanesan, Negosiante Ozaias da Costa Lopes, hateten, Ramos Horta la’ós foin mak tama merkadu Manleu maibé mai beibeik sosa modo.
“Nia (Horta) mai bebeik sosa modo, la’ós de’it tempu kampaña mak mai, atu dehan durante eleisaun prezidensiál dala hira kandidatu ida nunka mai iha ne’e. Maibé tinan ne’e iha kandidatu ida mai netik mak Ramos Horta, ho ida-ne’e ami negosiante kiik sira sente kontente tebes ho nia prezensa,” nia salienta.
Nu’udar vendedór, Ozaias konsidera presiza kria estabilidade no pás iha rai-laran, nune’e negosiante sira bele la’o bá-mai ho livre hodi buka moris.
Nune’e mós, Negosiante, Maria de Jesus Saldanha, hateten sé de’it mak sai Prezidente Repúblika, importante haree povu-nia moris.
“Ramos mak sai Prezidente Repúblika mós di’ak, Lú Olo mós di’ak, importante maka haree povu nune’e bele korre povu hosi kiak no mukit, tanba atu halo nusa mós ita sira kiik ne’e nafatin kiik, importante ba ami mak kria netik kondisaun mai ami no haree netik ami-nia sasán sira ne’e fa’an ba la folin,” Maria subliña.
Hafoin ramata kampaña iha Merkadu Manleu, kandidatu Ramos Horta ho ekipa susesu sira hala’o mós vizita ba komunidade sira iha Beduku, suku Tibar, postu Bazartete, munisípiu Liquiçá, ne’ebé durante atividade ne’e, ekipa susesu sira fahe stiker ba populasaun sira.
Jornalista : Antónia Gusmão
Editora : Julia Chatarina
