BAUCAU, DEFEZA, HEADLINE, MUNISÍPIU, POLÍTIKA, SEGURANSA

Forsa konjunta finaliza ona konstrusaun armazein aeroportu Baucau

Forsa konjunta finaliza ona konstrusaun armazein aeroportu Baucau

Forsa konjunta entre EUA no F-FDTL foto hamutuk ho Ministru Defeza Filomeno Paixão de Jesus no Enkaregadu Negósiu Embaixada EUA inklui konvidadu sira bainhira inaugura armazein iha aeroportu Baucau, kinta (07/04). Imajen Tatoli/Natalino Belo.

BAUCAU, 07 abríl 2022 (TATOLI) – Forsa konjunta entre enjeñeiru Estadu Unida Amérika (EUA) no FALINTIL-FDTL finaliza ona konstrusaun armazein no lutu perímetru iha projetu reabilitasaun aeroportu Baucau.

Enkarregadu Negósiu Embaixada EUA, Tom Daley  hateten reabilitasaun konjunta ba aeroportu Baucau nu’udar ezemplu di’ak kona-ba oinsá nasaun rua parséria hamutuk bele lori oportunidade no importante atu apoia Timor-Leste.

“Projetu ne’e sei fó dalan ba Timor-Leste atu halo monitorizasaun di’akliu ba nia territóriu, hodi hatán ba dezastre naturál sira no promove dezenvolvimentu ekonómiku. Ha’u-nia esperansa atu habelar liután parseria Estadu Unida ho Timor-Leste iha tinan hirak tuir mai, bainhira ita serbisu hamutuk atu harii futuru ida-ne’ebé nabilan, prósperu liu, no seguru liután ba ita-nia nasaun rua,” Enkaregadu Negósiu Embaixada EUA, Tom Daley hateten iha serimónia inaugurasaun aeroportu Baucau, kinta ne’e.

Medida armazein ne’e ho metru 477 kuadradu iha aeroportu Baukau, hanesan parte hosi faze dahuluk projetu reabilitasaun ho orsamentu millaun $10.6 husi Estadu Unida Amérika.

Projetu refere hahú konstrusaun iha loron 15 fulan-janeiru kompostu enjeñeiru sira hosi forsa aérea EUA, membru Forsa Naval Seabees na’in-10 no fuzileiru F-FDTL hamutuk 29 ne’ebé serbisu hamutuk hodi harii lutu ho naruk kilómetru 6.7 hodi asegura kampu aéreu no armazein ida hodi rai ekipamentu ba komponente aéreu foun F-FDTL nian ne’ebé oferese hosi Estadu Unida Amérika.

Tuir planu, EUA sei fornese ekipamentu no veíkulu sira ba Timor-Leste hodi apoia operasaun sira komponente aéreu nian, inklui kamioneta bombeiru nian ida, karreta hamoos pista, karreta Ford 350 rua, forklift ida no kamioneta kombustível rua.

Estadu Unida Amérika mós sei fornese aviaun vijilánsia Cessna 206 ne’ebé tuir previzaun sei to’o iha tinan ida-ne’ e, hanesan parte hosi projetu reabilitasaun.

EUA no Timor-Leste sei serbisu hamutuk hodi fornese melloramentu adisionál sira ba kampu aéreu, hadi’a torre kontrolu tránzitu aéreu nian, konstrusaun ba fatin sira hanesan estasionamentu Cessna nian, armazein adisionál ida hodi rai materiál asisténsia umanitária no instalasaun ba postu observasaun klimátika sira.

Estadus Unida Amérika no Timor-Leste nia parseria seguransa oferese ona oportunidade ba ezersísiu militár, programa interkámbiu ba dezenvolvimentu profisionál membru militár Timoroan sira, asisténsia umanitária no kooperasaun sokorru ba dezastre.

Dezde tinan 2009, Forsa Naval EUA Seabees harii ona projetu liu 100 ho valor liu millaun $50 hodi apoia setór saúde no edukasaun ba povu Timor-Leste.

Biban hanesan, Ministru Defeza, Filomeno Paixão agradese ba forsa konjunta hosi nasaun rua kompostu enjeñeiru sira hosi forsa aérea EUA, membru Forsa Navál Seabees na’in-10 no fuzileiru F-FDTL hamutuk 29 ne’ebé serbisu hamutuk hodi konstrui projetu konstrusaun armazein no moru protesaun iha aeroportu Baucau.

“Sira hadia ona moru retensaun, fatin ne’e seguru ona laiha karau ka animál atu atravesa no hein aviaun to’o atu halo vijilánsia,” Ministru Defeza, Filomeno Paixão akresenta.

Jornalista   : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!