EKONOMIA, HEADLINE

BNCTL loke ATM iha Caicoli hodi fasilita kliente halo tranzasaun

BNCTL loke ATM iha Caicoli hodi fasilita kliente halo tranzasaun

ATM Center BNCTL foun iha Caicoli, Eis Obrigadu Barak, sesta (08/04). Imajen TATOLI/Francisco Sony

DILI, 08 abril 2022 (TATOLI)—Banku Nasionál Komérsiu Timor-Leste (BNCTL, sigla portugés), sesta ne’e, inaugura Automated Teller Machine (ATM) foun, lokaliza iha Caicoli, Eis Obrigadu Barak.

Reprezentante BNCTL inaugura ATM Center iha Caicoli, Eis Obrigadu Barak, sesta (08/04). Imajen TATOLI/Francisco Sony

Fatin ne’e inaugura hosi Prezidente Konsellu Admininistrasaun BNCTL, António Vitor no akompãna hosi Vise-Prezidente Konsellu Administrasaun, enkaregadu CEO, Jestór no funsionáriu hosi sede sukursál Dili.   

“Objetivu lansa ATM center foun atu fasilita kliente BNCTL no kliente hosi banku seluk halo tranzasaun ho lais, seguru no konviniente durante 24 oras, tanba durante ne’e kliente sira atu foti osan sempre forma kleur, entaun ita kria ATM foun sira hodi fasilita foti osan ho lais,” Prezidente Konsellu Administrasaun BNCTL, hateten iha fatin instalasaun mákina, Caicoli.

Notísia relevante: BNCTL propoin instala ATM P24 iha Bobonaro no Batugade

Inisiativa ne’e loloos atu reliza ona iha tinan kotuk, maibé tanba situasaun COVID-19, mak parte banku hola inisiativa realiza fali iha tinan ne’e,  ho totál orsamentu ba konstrusaun fatin hamutuk $49.500.

Prezidente Konsellu Administrasaun BNCTL, António Vitor. Imajen TATOLI/Francisco Sony

“Bainhira iha tinan oin iha kapitál di’ak, ita haree nesesidade hodi kontinua investe tan ATM sira, nune’e bele halo atendimentu di’ak liután ba kliente sira,” nia akresenta.

Iha ATM Center ne’e, iha tempu badak, sei tau mós mákina Cash Recycling Machine (CRM) hodi fasilita kliente sira halo levantamentu no depózita osan.

Iha tinan ne’e, Banku Nasionál aumenta tan mákina foun hamutuk 27, ATM drive thru rua, ATM mobile lima, nune’e totál ATM iha territóriu laran tomak hamutuk unidade 68.

Reprezentante BNCTL halo teste tranzasaun iha ATM Center iha Caicoli, Eis Obrigadu Barak, sesta (08/04). Imajen TATOLI/Francisco Sony

Atu responde ba kliente iha kapitál Dili, BNCTL aumenta mákina ATM hamutuk unidade 39 no totál hosi ATM ne’e sei adere ba servisu P24.

Nune’e, parte seluk Banku Nasionál mós lansa integrasaun POS BNCTL ba rede P24, no Union Pay internasionál, hodi fasilita kliente halo tranzasaun iha loja supermerkadu, klínika estasaun kombustível, selu pasaporte, restaurante no seluk tan.

“Tinan ne’e ita sei instala tan mákina POS foun unidade 100, nune’e totál mákina hamutuk 150. Ita fazeadamente kontinua moderniza ita-nia servisu hodi mellora atendimentu ba kliente sira, iha rai-laran no mós iha rai-liur,” nia dehan.

Jornalista : Arminda Fonseca

Editora      : Julia Chatarina

iklan
iklan

Leave a Reply

iklan
error: Content is protected !!