DILI, 08 abríl 2022 (TATOLI)— Treinadór Prinsipál Selesaun Nasionál U‐19, Eduardo Pereira, informa, halo ona selesaun ba jogadór na’in-29 atu hahú treinu fíziku no tékniku hodi partisipa jogu Kopa Asian Football Federation (AFF) ne’ebé sei realiza iha fulan jullu, iha Indonézia.
“Preparasaun ba jogadór U-19 sira la’o hela, foin lalais ami halo ona selesaun ba jogadór na’in-29 mak liu kompostu hosi guarda rede na’in-lima no jogadór na’in 24, maibé iha fulan-maiu sei halo tan selesaun tanba tuir kriteria jogadór tenke hamutuk 25 de’it mak ba partisipa,” dehan Eduardo ba Agência TATOLI iha edifisiu Federasaun Futeból Timor-Leste (FFTL), sesta ne’e.
Jogadór U-19 na’in 11 mak sei reforsa hela iha U-23, nune’e eventu SEA Games ramata jogadór hirak ne’e sei junta hamutuk fali iha U-19.
Durante ne’e, hala’o treinamentu iha Kampu FFTL Dili, ne’ebé akompaña direita hosi Dato Gopal instrutór hosi AFC ne’ebé fahe mós matéria treinamentu balun ba jogadór sira.
“Tékniku jogu ita nian agora ho filozofia ida katak joga bola badak pasa hosi ain ba ain, buat hirak ne’e hotu ami konsege halo hotu no jogadór sira adapta ho di’ak tebes tanba ami halo jogu amigavel ho U-16 dala tolu hatudu rezultadu di’ak,” nia afirma.
Jogu ne’e, tuir oráriu hahú iha 02 too 19 jullu 2022, iha Indonézia no sei partisipa hosi nasaun 11 iha ASEAN hanesan, Cambodia, Indonézia, Singapura, Laos, Vietname, Thailandia, Myanmar, Malázia no Timor-Leste.
Notísia relevante:Selesaun Nasionál U-19 hahú prepara kompete iha Copa AFF 2022
Jornalista: Hortencio Sanchez
Editór : Florencio Miranda Ximenes
