DILI, 08 abril 2022 (TATOLI)—Ministériu Finansa (MF), sesta ne’e, lansa atualizasaun website foun ho link https://www.mof.gov.tl/, ne’ebé ho aparénsia foun no funsionalidade adisionál, ho objetivu atu fahe informasaun ba povu, kliente no parseiru ba atividade ministériu no servisu públiku balun.
“Website foun ne’e ho ninia funsionalidade (feature) foun, ne’ebé responsiva no kompatível, signifika públiku bele asesu liuhosi telemóvel, tablet no desktop ka komputadór iha kualker tempu no fatin,” Ministru Finansa, Rui Augusto Gomes, hateten iha auditorium MF, Aitarak-laran,
Funsionalidade foun ida mak informasaun kona-ba Invoice Tracking System, ne’ebé MF introdús iha tinan ne’e no bele asesu ona ba empreza sira bele buka tuir fatura.
“Ninia objetivu prinsipál mak atu redús atrazu pagamentu no evita pagamentu hasoru fatura ida no tempu ona atu ita adopta teknolojia dijitalizadu efikás liu do que uza ka repete prosedimentu antigu,” nia akresenta.
Notísia relevante: Sistema ASYCUDA World ajuda Alfándega iha servisu prosesa dokumentu merkadoria
Website atuál hosi MF, ne’ebé antes ne’e lansa iha tinan-10 liubá atu fasilita publika informasaun importante sira ba públiku hanesan livru Orsamentu Jerál Estadu (OJE), relatóriu ezekusaun OJE, informasaun kona-ba indikadór makro-ekonómiku hanesan inflasaun, kreximentu no dadus xave sira seluk.
Nune’e mós, aprovizionamentu públiku, dokumentu leilaun, asisténsia hosi parseiru dezenvolvimentu, vaga servisu iha MF inklui informasaun importante sira seluk.
“Antes ne’e ninia natureza komplexu tebes, tanba ne’e ita presiza hadi’a no atualiza website, atu nune’e bele responde ba nesesidade públiku, liuliu atu hasa’e efisiénsia no efetividade iha prestasaun servisu públiku,” Ministru akresenta.
Nune’e, website foun ne’e mós mai ho e-recruitment feature, ne’ebé liga diretamente ho Sistema Informasaun Rekursu Umanu MF, ne’ebé atu garante transparénsia iha rekrutamentu servisu inklui prosesu rekrutamentu tomak to’o aplikante ida selesionadu no hahú serbisu.
Kada etapa e-recruitment, aplikante sira sei hetan atualizasaun informasaun liuhosi mensajen automátika ida hosi sistema.
Ministru konsidera, ohin loron mundu globalizadu no digitalizadu ona, ho tan pandemia COVID-19 ne’e obriga nasaun hotu halo investimentu iha sistema no dijitalizasaun hodi fasilita komunikasaun entre organizasaun iha nasionál, rejionál no internasionál.
Inisiativa atualiza website foun ne’e hahú iha inísiu tinan kotuk hosi timor-oan na’in-haat ne’ebé daudaun ne’e serbisu iha Gabinete Sistema Integradu Informasaun Jestun Finanseira MF, ne’ebé hetan apoiu másimu hosi Vise-Ministra sesante, Sara Lobo Brites.
Timor-oan na’in-haat mak hanesan Bento de Carvalho hanesan Website Developer, Niza de Castro hanesan Database Administrator, Honorio dos Santos hanesan Chief of Application Management, ho lideransa hosi Ponciano Vieira hanesan Software Engineer, ne’ebé sira hotu enjeñeiru tékniku informátiku.
MF tau Importánsia automatizasaun
Inisiativa atualiza website foun MF tanba Governu lakohi hela iha kotuk, tanba ne’e MF fó importánsia ba automatizasaun ka dijitalizasaun sistema hodi bele kontribui ba reforma fiskál no jestaun finansa públika, ne’ebé hanesan reforma importante ida hosi reforma haat ne’ebé sai nu’udar prioridade iha programa VIII Governu konstitusionál.
“Iha tinan kotuk, ita introdús ona Advance Tracking no Invoice Tracking iha sistema GRP, iha fevereiru 2021, ita lansa sistema Janela Únika Nasionál (National Single Window of ASYCUDA World System), ne’ebé envolve instituisaun Estadu lubuk ida hanesan Autoridade Tributária, Servisu Imigrasaun, Ministériu Saúde, Ministériu Transporte no Komunikasaun, TradeInvest, no APORTIL,” Ministru Rui Gomes konta tuir.
Iha marsu 2021, MF lansa plataforma eletróniku ba pagamentu impostu liuhosi mákina ATM P24 no iha maiu lansa ona Liña Direta Alfándegariu ka Customs Hotline 12200.
“Iha fulan agostu tinan kotuk, ita kontinua lansa Portál Komérsiu Alfándega https://customs.gov.tl/ no iha ámbitu komemorasaun loron Proklamasaun Independénsia ba dala-46, ita mós lansa ona sistema administrasaun Tributária SIGTAS versaun 3, ne’ebé hanesan versaun ida avansadu liu,” Ministru dehan.
Dijitalizasaun ne’e MF halo ho objetivu atu fortalese mobilizasaun rekursu no haforsa akuntabilidade ba kualidade, efetividade no efisiénsia iha prestasaun servisu.
Jornalista : Arminda Fonseca
Editora : Julia Chatarina
