COVALIMA 09 abril 2022 (TATOLI)–Sekretáriu Tékniku Administrasaun Eleitorál (STAE) Covalima, Finaliza ona edukasaun votante ba eleitór sira hodi prepra hasoru eleisaun presidensiál ba segundu volta iha loron 19 abril.
“Ami-nia tékniku no brigada STAE sira finaliza ona edukasaun votante ba eleitór sira iha munisípiu covalima no agora hala’o avaliasaun serbisu hodi prepara realiza eleisaun ba segunda volta,” Diretór STAE Covalima, Francisco Gusmão, informa ba Agência TATOLI, iha ninia knaar fatin, kampung Baru, sábadu ne’e.
Notísia relevante: STAE Covalima distribui materiál eleisaun ba sentru votasaun 80
Edukasaun votante hala’o durante semana ida, iha postu administrativu hitu no suku 30 iha munisípiu covalima, hahú iha loron segunda to’o sesta semana ne’e ho objetivu atividade atu fahe informasaun kona-ba lala’ok eleisaun.
Bazeia ba kalendáriu ne’ebé aprova hosi Komisaun Nasionál Eleisaun (CNE, sigla portugués), kandidatu Prezidente Repúblika halo kampaña eleitorál hahú iha loron 02 to’o 13 abril.
Tuir dadus hosi STAE covalima, eleitór ne’ebé atu vota hamutuk 47.476 hosi númeru ne’e eleitór ne’ebé tuir vota iha eleisaun faze dahuluk hamutuk 37.543, ho taxa partisipasaun 79% no eleitór 10.000 resin mak la tuir vota.
Jorbalista : Celestina Teles
Editora : Julia Chatarina
