COVALIMA, ELEISAUN

Governu apela líder komunitária mobiliza komunidade partisipa iha eleisaun segunda volta

Governu apela líder komunitária mobiliza komunidade partisipa iha eleisaun segunda volta

Eleitór sira iha sentru votasaun suku Holsa, postu administrativu Maliana, munisípiu Bobonaro forma hela atu ba vota. Imajen Tatoli/Sérgio da Cruz.

COVALIMA, 11 abríl 2022 (TATOLI)–Governu liuhosi Ministériu Administrasaun Estatál (MAE) apela ba líder komunitária atu mobiliza komunidade partisipa másímu hodi ezerse sira-nia direitu votu iha eleisaun prezidensiál segunda volta ne’ebé sei realiza iha 19 fulan abríl tinan ne’e.

“Mensajen ida mak ha’u hakarak atu hato’o ba xefe suku sira mak haloos liafuan sira-ne’ebé durante ne’e mosu, tanba ha’u hatene eleitór iha Covalima 1000-resin mak la ezerse nia direitu ba vota. Iha sentru votasaun paralelu iha dili mós funsiona ladún di’ak, nune’e eleitór balun mós la ezerse nia direitu votu. Tanba ne’e, xefe suku sira tenke mobiliza eleitór sira ba vota,” Reprezentante Ministériu Administrasaun Estatál, Diretór Jeral Dezenvolvimentu Rurál, Rosito Guterres, hato’o liuhosi nia diskursu antes distribui materiál informátika ba xefe suku sira iha salaun administrasaun Covalima, Kampung Baru, segunda ne’e.

Governu liuhosi Ministériu Administrasaun Estatál (MAE) sei la rejista eleitór foun sira-ne’ebé atu vota iha sentru votasaun parelelu iha eleisaun segundu volta tanba lei la autoriza. 

Se xefe suku sira iha oan, alin ka subriñu balun iha Dili foin lalais reklama maibé la tuir vota di’akliu hateten ba sira fila sedu ba iha ida-idak nia suku hodi tuir vota atu labele lakon tan sira-nia direitu votu.

“Ha’u husu xefe suku no administradór munisípiu sira parese simu mós karta ida sei haruka ba ita-boot sira, garantia ita-boot sira-nia sidadaun hotu seguru no livre hodi goza direitu iha tempu eleisaun. Laiha prezuiju no presaun ruma entre grupu, nune’e líder komunitária tenke garantia,” nia dehan.

Xefe suku Maudemo, Maria Fátima reforsa, nu’udar líder komunitáriu molok atu realiza eleisaun fó aviza ba komunidade atu ezerse sira-nia direitu votu iha eleisaun prezidensiál segunda volta.

“Ami hanesan xefe suku, bainhira ami realiza enkontru iha sede suku, ami sempre fó hanoin ba komunidade iha loron votasaun hotu-hotu tenke ezerse nia direitu votu, hodi hakat ba sentru votasaun atu tuir votasaun,” nia hateten.

Tuir dadus hosi STAE Covalima rejista katak eleitór ne’ebé atu vota hamutuk 47,476 no hosi númeru ne’e eleitór ne’ebé tuir vota iha eleisaun primeira volta hamutuk 37,543 ho taxa partisipasaun 79,065% no eleitór 1000-resin mak la tuir vota.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!