iklan

EKONOMIA, HEADLINE, MUNISÍPIU, VIQUEQUE

Grupu Welera sei lori  tais hali mean Viqueque kompete iha nasionál

Grupu Welera sei lori  tais hali mean Viqueque kompete iha nasionál

Grupu soru tais hasai imajen hamutuk hafoin hasoru kompetisaun soru tais ba feto foin-sa’e, iha suku Uma Kiik, segunda (11/04). Imajen TATOLI/Vitorino Lopes da Costa

VIQUEQUE, 11 abril 2022 (TATOLI)—Grupu Welera sei lori tais hali mean reprezenta tais munisípiu Viqueque tuir kompetisaun iha nível nasionál ne’ebé organiza hosi Munistériu Turismu, Komérsiu no Indústria (MTKI) iha maiu 2022 hodi komemora loron restaurasaun independénsia.

“Razaun ami lori tais ne’e kompete iha nasionál tanba kultura tais Viqueque maka hali mean. Daudaun ami prepara kondisaun kompete soru tais  iha nasionál, ami sei prepara materiál soru tais, kabas no roupa ba grupu sira uza iha kompetisaun,” Koodenadora Grupu Welera, Joana Sarmento, hateten ba Agência TATOLI, iha suku Uma Kiik, segunda ne’e.

Notísia relevante: Grupu Welera sai vensedór dahuluk kompetisaun soru tais iha Viqueque

Kompetisaun nasionál sei envolve munisípiu 12 inklui Rejiaun Administrativa Espesiál Oé-cusse Ambeno (RAEOA).

Grupu Welera harii iha tinan 2016, iha aldeia Luha, suku Uma Kiik, postu administrativu Viqueque villa, ne’ebé daudaun halo atividade prodús tais hodi fa’an.

“Ami hetan osan hosi soru tais. Iha tinan 2016 ami halo proposta ba Sekretaria Estadu Igualdade no Inkluzaun (SEII) no hetan apoiu orsamentu hamutuk $1.500 hodi ami uza to’o agora hodi sosa materiál halo tais,” nia akresenta.

Nune’e, hafoin halo produsaun grupu ne’e fa’an iha merkadu Viqueque villa iha loron sábadu no domingu tanba seidauk hetan fatin própriu.

“Rendimentu hosi fa’an tais hodi selu oan sira-nia eskola, halo uma no balun uza ba nesesidade uma-laran nian,” nia tenik.

MTKI realiza kompetisaun soru tais ba feto foin-sa’e sira hodi promove eransa kulturál, hahú iha loron 06 to’o 11 abril, ne’ebé Grupu Welera sai vensedór dahuluk no hetan osan hamutuk $200 ho sertifikadu inklui partisipa kompetisaun iha nasionál iha maiu 2022.

Jornalista : Vitorino Lopes da Costa

Editora     : Julia Chatarina

iklan
iklan

Leave a Reply

iklan
error: Content is protected !!