Konstrusaun rezidénsia Administradór Covalima sei finaliza iha outubru 2022
COVALIMA, 11 abríl 2022 (TATOLI)–Diretór Planu Dezenvolvimentu Integradu Munisipál (PDIM), Afonso Nogueira Nahak hateten, projetu PDIM konstrusaun rezidénsia administradór Covalima no edifísiu Postu Administrativu (PA) Maucatar ne’ebé implementa iha 2021 ne’e sei finaliza iha outubru 2022.
Notísia Relevante: Projetu PDIM Covalima prioridade konstrui rezidénsia administradór-edifisiu PA
“Bazea ba ami-nia munitorizaun Konstrusaun projetu PDIM Covalima ne’ebé prioridade konstrusaun edifisiu administradór Covalima no edifisiu postu administrativu Maucatar ne’ebé hahú konstrui iha tinan 2021, sei finaliza iha fulan outubru tinan ne’e,” Afonso Nogueira Nahak informa ba Agência Tatoli, iha salaun administrasaun Covalima, Kampung Baru, segunda ne’e.
Tuir monitorizaun, konstrusaun edifisiu postu administrativu Maucatar atinje ona 47% no rezidénsia administradór munisípiu Covalima nia progresu fizíku atinje ona 36%, ne’ebé implementa projetu ne’e mai hosi orsamentu jeral estadu tinan 2021.
Tanba ne’e, nia garante projetu PDIM rua ne’e sei finaliza iha tinan ne’e bainhira la hasoru obstakulu ruma, laiha razaun iha tinan ne’e labele finaliza osan ne’ebé iha no tékniku sira loro-loron akompaña iha terrenu
Edifisiu Postu Administrativu Maucatar konstrui hosi kompañia SABUDOI Unipesial Lda ne’ebé konstrusaun ho nia durasaun tempu durante fulan neen (6) hahú hala’o lansamentu iha loron 05 janeiru tinan 2022.
Konstrusaun rezidénsia administradór munisípiu Covalima ho nia medida metru 30,70 X 22,50 ne’e konstrui hosi kompañia VERDE CAISAHE Lda ho nia durasaun tempu durante fulan neen (6).
Tuir livru 3B Orsamentu jerál Estadu (OJE) tinan 2021, munisípiu Covalima prevee konstrusaun ba rezidénsia administradór munisípiu Covalima hamutuk $262.570 no konstrusaun edifísiu postu administrativu Maucatar ho moru haleu hamutuk $179,438.
Jornalista : Celestina Teles
Editor : Cancio Ximenes
