DILI, 13 abril 2022 (TATOLI)—Governu liuhosi Ministériu Turizmu Komérsiu no Indústria (MTKI) tinan kotuk inisia kompetisaun negósiu inovativu, ne’ebé empreza 290 mak hato’o aplikasaun, ikus mai na’in-29 mak hetan aprovasaun.
Vise-Ministru Turizmu Komérsiu no Indústria, Domingos Lopes Antunes, hateten, programa ho kolaborasaun hosi Institutu Apoiu Dezenvolvimentu Emprezariál (IADE) no Programa Nasaun Unida ba Dezenvolvimentu (UNDP, sigla inglés), mai ho objetivu fó oportuniadade ba empreza ne’ebé foin hahú negósiu partisipa kompetisaun hodi aprezenta negósiu inovativu.
“Empreza na’in-29 ne’ebé ita aprova ona hala’o negósiu iha transformasaun ai-han, mobiliáriu, prodús produtu enkubatór, produsaun sumu lokál, ukir ai no vidru no seluk tan,” governnate ne’e informa ba Agência TATOLI, iha ninia knaar fatin, Bebora, tersa ne’e.
Notísia relevante: IADE apoiu $113.000 ba empreza selesionadu 19 programa inkubasaun negósiu
Empreza sira ne’ebé sai manan-na’in aprezenta produtu iha ema barak nia oin, ho juri hosi UNDP, Kámara Komérsiu no Indústria Timor-Leste (CCI-TL,sigla portages) IADE, no MTKI.
“Orsamentu ne’ebé ita prevee ba programa kompetisaun inovativu iha tinan kotuk hamutuk $200.000 no hosi UNDP $40.000,” nia akresenta.
Ba tinan ne’e, MTKI sei kontinua programa hanesan iha nível munisípiu ne’ebé ba inisativa ne’e prevee tan osan $100.000.
“Daudaun ne’e akipa sei haree liuhosi fasilidade inkubasaun atu apoiu sira ne’ebé foin hahú negósiu,” Vise-Ministru tenik.
MTKI hamutuk ho UNDP no Knua Juventude fila-liman sei lansa Timor-Leste Bussiness Incubation iha Matadouro.
“Daudaun ne’e estudu inkubasaun la’o hela no bainhira estudu detalladu hotu, ami bele iha eskritóriu boot atu fornese fasilidade inkubasaun, hanesan intervensaun seluk hosi Governu,” nia salienta.
Notísia relevante: OJE 2022: IADE husu adisionál $480.000 hodi finansia inkubasaun negósiu
Kritéria atu partisipa iha kompetisaun negósiu inovativu mak hanesan ho kréditu suave, tenke rejistu iha Servisu Rejistrasaun no Verifikasaun Emprezariál Instututu Públiku (SERVE) no tenke hanoin iha planu negósiu, inklui kompleta kritériu administrativa hanesan Kartaun Eleitorál, Billete Identidade no seluk.
Jornalista : Arminda Fonseca
Editora : Julia Chatarina
