MEJD adia estabelesimentu eskola referénsia ba tinan 2023
DILI, 12 abril 2022 (TATOLI)–Planu Ministériu Edukasaun Juventude no Desportu (MEJD) nia atu estabelese eskola referénsia hodi garante kualidade ensinu aprendizajen iha territóriu nasionál adia ba tinan 2023.
Ministru Edukasaun Juventude no Desportu, Armindo Maia, admite programa ne’e planeia ona desde tinan kotuk, ne’ebé parte ministériu rasik halo ona observasaun ba eskola balun iha munisípiu neen.
“Loloos tinan ne’e implementa iha munisípiu balun, maibé planu no programa prioridade ne’e la konsege realiza tanba ita-nia orsamentu tinan ne’e ko’a maka’as. Tanba ne’e ita labele realiza,” Ministru Armindo Maia hateten iha Palásiu do Governu, tersa ne’e.
Notísia relevante: MEDJ sei transforma ESJ no ESTV balun sai eskola referénsia
Proposta orsamentu MEJD ba tinan 2022 hamutuk $105, maibé ikus mai aprova de’it millaun $80.
“Tanba ne’e planu no programa ne’ebé trasa ona labele realiza. Orsamentu MEJD tinan 2021 hamutuk millaun $105, maibé tinan ne’e tun maka’as loos,” nia akresenta.
Parte ministériu iha esperansa iha tinan 2023 bele hetan filafali rekuperasaun, nune’e planu no programa prioridade sira ho intensaun atu dezenvolve edukasaun iha territóriu nasionál inklui eskola referénsia bele realiza.
Antes ne’e, MEJD iha planu atu estabelese eskola referénsia ensinu sekundáriu jerál no ensinu sekundáriu tékniku vokasionál iha kada munisípiu.
Jornalista : Tomé Amado
Editora : Julia Chatarina
