RSN Covalima imprime Billete Identidade provizóriu ho HVS

COVALIMA, 12 abril 2022 (TATOLI)–Diretór Rejistu Sivíl no Notariadu (RSN) Covalima,  António Samento informa, daudaun ne’e RSN Covalima imprime Billete Identidade (BI) provizóriu ho surat-tahan HVS (Lian Olanda, Houtvrij Schrijfpapier; surat-tahan hakerek nian) ba tanba blanku orijinál laiha ona.

“Hahú loron 11 fulan-abril tinan ne’e, ami laiha ona blanku BI nian nune’e ami imprime BI provizóriu ho surat-tahan mutin (HVS) ba sidadaun sira no hein blanku orijinál mai ona mak ami sei imprime BI orijinál ba sidadaun sira,” António Samento hateten ba Agência Tatoli, iha nia knar fatin, Santa Rosa, Covalima, tersa ne’e.

Rejistu Sivíl no Notariadu Covalima laiha ona blanku orijinál fó impaktu ba servisu funsionáriu  sira-ne’ebé hala’o servisu ho doubru, tanba hafoin imprime BI ho surat-tahan mutin (HVS) no bainhira blanku orijinál iha ona mak tenke imprime fali.

Ba kestaun ne’e, sira-nia parte haruka ona pedidu hodi husu blanku Billete Identidade orijinál iha Dirssaun Jerál maibé sira haruka bazea ba pedidu no haree mós ho númeru atendimentu kada fulan.

Tanba, nia informa, foin lalais ne’e dirasaun jerál transporta ona blanku Billete Identidade orijinál hamutuk 1.700 maibé agora laiha ona blanko orijinál entaun tenke imprime BI hodu uza de’it surat-tahan HVS.

Diresaun Jerál tranporta blanku BI la’ós ba munisípiu Covalima de’it maibé ba munisípiu 12 seluk inklui haruka ba Rejiaun Administrativa Espesiál Oé-Ccusse Ambeno (RAEOA), tanba ne’e prosesu durante semana ida ka rua mak foin transporta mai iha Covalima.

Bazea ba dadus ba sidadaun ne’ebé trata BI iha trimestre dahuluk (janeiru-marsu) ne’e, sidadaun ne’ebe trata dokumentu sertidaun RDTL hamutuk na’in-1910 no sidadaun ne’ebé trata BI hamutuk na’in-2650.

Jornalista : Celestina Teles

Editór        : Cancio Ximenes