DILI, 12 abril 2022 (TATOLI)—Sekretaria Estadu Ambiente (SEA) iha trimestre dahuluk (janeiru to’o marsu) ezekuta ona Orsamentu Jerál Estadu (OJE) 2022 atinje 18,13% ne’ebé ekivalente ho $436.451,38 hosi totál alokasaun $2.753.596.
“Orsamentu ne’ebé ita seidauk ezekuta tanba prosesu konkursu sira ne’e seidauk konklui, foin servisu haat mak finaliza konkursu, maibé kompañia seidauk oferese relatóriu entaun ita seidauk halo pagamentu nune’e ezekusaun sei mamuk,” Diretór Nasionál Planeamentu Finansa no Admnistrasaun SEA, Domingos Mesquita, hateten ba Agência TATOLI, tersa ne’e.
Notísia relevante: OJE 2022 ba SEA aprova iha espesialidade
Nune’e, obrigasaun hamutuk $22.565,50, kompromisu $40.280,35, no totál balansu $2.254.298,77.
Nia dehan, durante sira ezekuta OJE 2022 laiha dezafiu, tanba OJE ne’e kada tinan koloka bazeia ba planu serbisu.
“Entaun saida mak ita halo bazeia ba osan ne’ebé iha, tanba ami parte planeamentu iha prinsípiu planeamentu ne’ebé hateten hakerek saida mak halo no halo saida mak hakerek,” nia subliña.
Alokasaun ba kategoria saláriu no ventimentu $719.676 ezekuta ona $165.080,92 (22,94%), bens no servisu $1.441.620 ezekuta ona $272.370,46 (23,18%), kapitál menór $177.300 (0%), kapitál dezenvolvimentu $210.000 (0%), no transferénsia públika $205.000 (0%).
Jornalista : Arminda Fonseca
Editora : Julia Chatarina
