DILI, 13 abril 2022 (TATOLI)—Ministru Petróleu no Minerál, Víctor da Conceição Soares, aprezenta Projetu Dekretu-Lei ba atribuisaun subsídiu kombustível, iha reuniaun Konsellu Ministru (KM) no hetan ona aprovasaun.
Ministru Prezidénsia Konsellu Ministru interinu, Rui Augusto Gomes, informa, subsídiu hanaran ‘voucher kombustível’ sei fó ba operadór transporte rodoviáriu públiku, operadór transporte aéreu no marítima nasionál no kompradór kombustível ne’ebé hala’o atividade agríkola no peska nian.
“Voucer ida-ne’e, ezemplu iha presu kombustível gazolina litru ida $1, maibé derrepente sa’e ba $1,25, entaun $0,25 ne’e maka sei subsidia hosi Governu, ita konzela presu konvustível, ida-ne’e maka intensaun hosi Dekretu-Lei ne’e,” Ministru esplika hafoin reuniaun ezekutivu, iha Palásiu Governu.
Notísia relevante: ANMP rekomenda opsaun tolu ba Governu hodi kontrola folin kombustível
Tuir atuál Ministru Finansa, inisiativa ne’e mosu tanba haree ba situasaun ne’ebé akontese iha Ukránia, ne’ebé provoka aumentu substansiál ba folin petróleu.
“Diploma ne’e hakarak garante estabilidade presu kombustível no evita konsekuénsia prejudisiál ba ekonomia no konsumidór sira. Tanba ne’e, presiza títulu exesionál no tranzitóriu atu halo intervensaun iha merkadu kombustível, ho hanoin atu hamenus impaktu aumentu presu kombustível ba transporte públiku no atividade fundamentál sira seluk ba ekonomia nasionál,” governante ne’e dehan.
Notísia relevante: TANE Konsumidór husu MPM regula folin kombustível
Diploma ne’e sei válidu to’o loron 31 jullu 2022 no bele mós prolonga karik iha kondisaun exesionál ba aumentu presu iha merkadu kombustível kontinua la estável.
“Subsídiu ne’e sei implementa liuhosi diskontu iha estasaun kombustível ho ninia montante ne’ebé korespondente ba 100%, hosi valór diferensa entre folin gazolina ka gazóleu litru ida iha dezembru 2021 no folin gazolina ka gazóleu litru ida iha data fó sai voucher kombustível, ho konsiderasaun ba tipu kombustível no ninia karakterístika sira,” nia tenik.
Jornalista : Antónia Gusmão
Editora : Julia Chatarina
