VIQUEQUE, 13 abril 2022 (TATOLI)–Komandu Polísia Nasionál Timor-Leste (PNTL) munisípiu Viqueque, detein ona sidadaun ida ho inisiál MCM, ne’ebe halo kobaransa ilegál iha Viqueque.
“PNTL munisípiu Viqueque foin lalais deskobre ema halo kobaransa ilegál, konsege kaptura suspeitu MCM. PNTL uza ninia kompeténsia tuir lei, detein 72 oras iha sela hodi hein prosesu investigasaun no bainhira ramata sei lori dokumentu aprezenta iha Ministériu Públiku. Ita fiar desizaun Tribunál sei mai no sei tuir julgamentu tanba ema ida uza ninia poder ka inisiativa de’it halo kobaransa ne’e viola lei,” Komadante PNTL munisípiu Viqueque, Superintendente Polísia, Sebastião Alves Quintão, hateten ba Agência TATOLI, iha ninia knaar fatin, kuarta ne’e.
Notísia relevante: PNTL Viqueque fó seguransa másima durante kampaña segunda volta
Tuir kronolojia, kazu kobaransa ilegál ne’e akontese iha loron domingu, 10 abril 2022 maizumenus tuku 14:00 lorokraik, Polísia kaptura MCM iha Beloi, suku Caraubalho, postu administrativu Viqueque villa, ne’ebé suspeitu deskonfia komete kazu burla simples.
Tuir deklarasaun ne’ebé MCM presta iha Polísia Investigasaun, suspeitu hanesan membru hosi Movimentu Rezisténsia Apoiu Komadante em Xefe, Kay Rala Xanana Gusmão (MAROMKX-KXG) hosi Dili, ne’ebé konfirma katak nia hetan kontaktu hosi ema ida naran Manuel, atu mai hosi sira-nia uma iha Viqueque, atu ko’alia kona-ba dokumentu viza klandestina balun ne’ebé seidauk loos.
Nune’e, MCM mai iha Beloi hasoru ho vítima sira hanesan Vitori ho Bernabe no iha hasoru malu ne’e, sira hatudu viza klandestina ne’ebé seidauk prosesa bainhira rejista iha tinan 2003. Maibé, suspeitu dehan hakarak tulun vítima sira, entaun vítima na’in-rua entrega osan hamutuk $200, ne’ebé ikus mai deskobre suspeitu la’ós membru Komisaun Veteranu ka membru ruma hosi Komisaun Verifikasaun ba dadus klandestina nian.
Hafoin MCM simu osan no tau iha envolope laran, Polísia mós to’o no lori suspeitu ba Eskuadra postu Viqueque villa hodi submenta ba investigasaun.
“MCM ho intensaun atu ajuda lori viza vítima sira-nia ba imprimi no haruka fila mai vítima sira, maibé osan nia uza ba nia-an rasik tuir nia (MCM) deklarasaun. Suspeitu hetan ona TIR ho konstitui ona hanesan arguidu no hein bainhira Ministériu Públiku bolu atu presta deklaran,” Superintendente Polísia, Sebastião Alves, haktuir.
Eskuadra Viqueque lori ona kazu kobarasan ilegál rejista iha Ministériu Públiku iha loron segunda 11 abril 2022.
Joranlista : Vitorino Lopes da Costa
Editora : Julia Chatarina
