DILI, 14 abríl 2022 (TATOLI)—Governu liuhosi Ministru Administrasaun Estatál, Miguel Pereira de Carvalho, kuarta ne’e, inaugura projetu Konstrusaun Uma Kbiit Laek no reabilita bee-moos sistema gravitasaun iha Suku Railaco Leten, postu administrativu Railaco, munisipiu Ermera.
Notísia Relevante: Tinan 2022: Governu sei konstrui Uma Kbiit Laek 4.000
“Ha’u sente orgullu tanba teknikamente uma hirak ne’ebé konstrui iha munisipiu Ermera liu-liu iha postu administrativu Railaco, suku Railaco Leten ne’e, benefisiáriu duni ba komunidade hirak ne’ebé laiha duni Kbiit,” refere komunikadu imprensa ne’ebé Agência Tatoli asesu, kinta ne’e.
Nota ne;e haktuir, programa prioridade VIII Governu Konstitusionál ne’ebé lidera hosi Primeiru-Ministru, Taur Matan Ruak, mak “Ema ba Ema” hodi nune’e Governu sei investe ba povu nia moris di’ak.
“Uma Kbiit Laek ne’e ho tipu uma 37m² iha varanda oin, sala vizita, kuartu rua, dapur ho haris fatin,” nota ne’e hateten.
Iha fatin hanesan, Ministru Administrasaun Estatál, Miguel Pereira de Carvalho, mós inaugura reabiltasaun bee-moos sistema gravitasaun iha suku Railaco Leten.
Partisipa iha serimónia ne’e, reprezentante prezidente autoridade munisipiu Ermera, Diretora PNDS Nasionál no Munisipiu Ermera, Diretór Servisu Munisipál, Ekipa PARTISIPA, líder komunitária sira, veteran sira no komunidade iha fatin refere.
Notísia Relevante: Konstrusaun Uma Kbiit Laek 2021 atinje ona 91%
Jornalista : Osória Marques
Editór : Cancio Ximenes
