Governu Xina autoriza bolseiru timor-oan 128 fila fazeadamente kontinua estudu
DILI, 14 abril 2022 (TATOLI)—Governu Xina autoriza ona bolseiru timor-oan na’in-128 ne’ebé antes ne’e repatria tanba COVID-19, hodi fila fazeadamente kontinua estudu.
“Ami hetan ona lisensa hosi Governu Xina liuhosi ninia Embaixada iha Timor-Leste, ne’ebé husu ami atu ba fazeadamente,” Prezidente Asosiasaun Estudante Timor-oan iha Xina, Esmeraldito Ferreira, hateten iha Café Letefoho, kinta ne’e.
Estudante Medisina iha Funda University ne’e dehan, bazeia hosi lista estudante ne’ebé prepara hosi Governu Xina no fó sai hosi Embaixada, indika estudante 18 mak sei arranka uluk.
“Iha ona lista atu arranka uluk hodi kontinua sira-nia estudu iha provínsia ne’ebé maka Governu Xina konsidera laiha ona risku ba COVID-19. Ita tenke kumpre regulamentu ne’ebé sira husu ona ami atu ba fazeadamente ka tuir grupu, ne’e desizaun ita labele kontra,” nia akresenta.
Notísia relevante: Governu prontu repatria estudante timor-oan iha rai li’ur
Tuir Reprezentante estudante, inisiativa ne’e tanba esforsu hosi bolseiru sira rasik ho hanoin bainhira Governu Xina seidauk fó autorizasaun, maka estudante sira sei halo aprosimasaun ho VIII Governu hodi ajuda estudante sira.
Estudante na’in-128 ne’ebé estuda iha xina, antes ne’e repatria iha tinan 2020 ho razaun COVID-19 momentu ne’ebá hahú mosu ho númeru boot iha Xina inklui razaun seluk.
“Ha’u fila mai iha loron 22 fevereiru 2020, bainhira ha’u-nia pasaporte besik expira ona, ha’u husu ba Embaixada Timor-Leste iha Xina atu halo renovasaun, maibé sira dehan labele renova iha Xina maibé tenke iha Timór, ho nune’e obrigasaun ha’u-nia tenke mai halo renovasaun pasaporte iha Timór. Bainhira halo renovasaun ne’e maka mosu tan moras COVID-19, entaun ha’u labele filafali ba Xina to’o ohin loron,” nia haktuir.
Maibé iha estudante balun fila mai Timór tanba pasa feira ho família no seluk fali tanba rona mosu ona moras COVID-19.
Iha fatin ketak, Ministru Ensinu Superiór Siénsia no Kultura (MESSK), Longuinhos dos Santos, hateten, asuntu ne’e nia hato’o ona iha Konsellu Ministru no haruka ona karta ba Ministériu Finansa (MF).
“Ministériu Finansa husu ita halo analiza orsamentu Fundu Dezenvolvimentu Kapitál Umanu, maibé iha ne’ebá iha la prevee orsamentu ba kondisaun ne’e. Entaun ha’u haruka fali karta tuir mai ba Ministériu Finansa no hato’o ona iha Konsellu Ministru. Ministru Finansa hateten nia sei haree verba ida-ne’e hafoin iha tempu besik sei fó resposta,” Ministru informa.
Montante orsamentu ba estudante 128 seidauk define tanba MESSK sei konsulta ho MF, maibé orsamentu sei kobre kustu kuarentena inklui billete.
“Ha’u seidauk bele fó sai lai tanba seidauk hetan aseitasaun hosi Ministériu Finansa,” nia akresenta.
Jornalista : Tomé Amado
Editora : Julia Chatarina
