MJ rejista kompañia 220 seidauk selu areendamentu ba Estadu
DILI, 14 abril 2022 (TATOLI)— Ministru Justisa (MJ), Tiago Amaral Sarmento, informa daudaun ne’e rejista kompañia nasionál internasionál hamutuk 220 mak seidauk selu arrendamentu ba Estadu.
Hosi totál empreza 220 ne’e kompostu hosi kompañia nasionál hamutuk 200 no internasionál 20.
“Empreza hirak ne’e la kumpre sira nia devér liuhosi kontratu areendamentu ne’ebé selebra ona ho Ministériu Justisa” Governante ne’e hateten ba jornalista sira hafoin enkontru ho Prezidente Komisaun C iha Gabinete Ministériu Justisa, Caicoli, kinta ne’e.
Diresaun Nasionál Terras no Propriadade (DNTP) hahú indetifika ona empreza hirak ne’e no submete ona lista ba Ministériu Justisa atu haree hodi foti desizaun ruma kona-bá kompania sira ne’e.
Nune’e, Ministériu Justisa (MJ) sei hasai konvite ida atu konvida sira empreza hotu ne’ebé la selu areendamentu ba Estadu hodi hala’o reuniaun alargada ida ho Ministru Justisa, hodi esplika lei arrendamentu rai no uma Estadu.
“Ita atu esplika lei rai ne’ebé mak foin promulga hosi Prezidente Repúblika atu fó hatene sira katak sira iha dever tenke kumpri lei no iha dever tenke selu rai no uma Estadu,” Ministru Justisa esplika.
Bazeia ba akordu areendamentu ne’ebé kompañia nasionál no internasionál selebra ho Estadu Timor-Leste katak iha dever selu areendamentu rai ba Estadu ne’e hosi valór $300 to’o $1.000 no $1.500 too $500.000. Tanba depende ba rai nia luan no uma.
“Tanba ne’e, Ha’u husu kompañia nasionál no internasionál sira tenke kumpre dever tuir saida mak asina ona iha akordu areendamentu nia laran,” nia rekomenda.
Maske, Ministru Tiago dehan nia mandu iha tinan ida ho balun, maibé garante sei solusiona problema areendamentu rai liuliu obriga empreza sira ne’ebé aluga propriedade Estadu atu halo pagamentu.
Iha biban hanesan, Deputadu Parlamentu Nasionál, António Maria Nobre Amarál Tilman, husu ba Ministériu Justisa (MJ) atu obriga empreza nasionál no internasional sira tenke kumpre lei hodi selu areedamentu ba Estadu.
“Ita haree kompañia nasionál no internasionál uza uma no rai Estadu nian halo investimentu, maibé la kumpre lei hodi selu areendamantu, nune’e ha’u husu Ministru Justisa tenke haree ba ida ne’e,” Deputadu ne’e sujere.
Jornalista : Natalino Costa
Editór : Florencio Miranda Ximenes
