VIQUEQUE, 18 abril 2022 (TATOLI)-–Administradór postu Uatucarbau, munisípiu Viqueque, Alfredo dos Santos, enkoraja populasaun partisipa iha eleisaun prezidensiál segunda volta iha loron 19 abril.
“Ha’u husu populasaun Uatucarbau tomak, aban tenki partisipa másimu iha eleisaun hodi ita hili ita-nia Prezidente Repúblika ba períodu 2022-2027,” Autoridade postu hateten ba Agência TATOLI, iha postu Uatucarbau, segunda ne’e.
Tuir Alfredo dos Santos, eleitór ne’ebé la partisipa eleisaun primeira volta maioria estudante Uatucarbau-oan ne’ebé hela iha Dili tanba laiha transporte.
“Ha’u haree iha eleisaun dahuluk estudante universitáriu Uatucarbau iha Dili ne’ebé la partisipa eleisaun kuaze 100 resin, tanba sira iha difikuldade ba transporte, maibé iha segunda volta Governu fasilita ona hodi mai vota,” nia akresenta.
Notísia relevante: MAE koordena ho CCI-TL transposta eleitór sira vota iha munsípiu
Biban ne’e, nia haktuir, durante mini-kampaña Kandidatu Prezidente Repúblika na’in-rua la’o di’ak no hakmatek.
Eleisaun prezidensiál segunda volta iha Viqueque estabelese sentru votasaun 92 no estasaun votu 110 iha postu lima.
Tuir dadus, númeru eleitór eleisaun prezidensiál 2022 iha munisípiu Viqueque hamutuk 58.421, kompostu hosi mane 29.675 (51%) no feto 28.746 (49%), partisipa eleisaun 43.252 (74,73%).
Iha eleisaun primeira volta iha loron 19 marsu iha munisípiu Viqueque, eleitór ne’ebé la partisipa eleisaun hamutuk 14.629, nune’e CNE esforsu hodi fahe informasaun liuhosi meiu komunikasaun hodi sidadaun sira ne’ebé la partisipa eleisaun primeira volta bele partisipa fali.
Jornalista : Vitorino Lopes da Costa
Editora : Julia Chatarina
