BOBONARO, 18 abríl 2022 (TATOLI) – Sekretariadu Tékniku Administrasaun Eleitorál (STAE) Munisípiu Bobonaro, segunda ne’e distribui ona materiál eleisaun prezidensiál volta daruak ba sentru votasaun hamutuk 130 no estasaun votu 150 iha postu administrativu neen.
Serimónia distribuisaun ne’e hala’o iha edifísiu STAE Bobonaro no loke ofisialmente hosi Sekretáriu Autoridade Munisípiu Bobonaro, João Fátima do Carmo no asina termu entrega hosi Diretór STAE Bobonaro, Mariano Viegas Amaral ba Komandante PNTL Bobonaro, Superintendente Antoninho Mauluta no sasin hosi Diretór CNE munisípiu Bobonaro Juvito Ramos.
Materiál eleisaun fahe parte rua kompostu hosi materiál sensitivu mak hanesan buletin votu livru 1.586 ho totál folla 79,300 no karimbu ho tinta indelével kuantidade 600 kabina votu 100. Enkuantu materiál la’ós-sensitivu sira mak hanesan, kaixote, akta rezultadu eleisaun, formuláriu reklamasaun, pasta, fita no stop map.
Materiál hirak-ne’e transporta ho viatura hamutuk 41 kompostu hosi karreta estadu ne’ebé hetan hosi diresaun patrimóniu estadu, autoridade munisípiu hamutuk 20 no karreta aluga hamutuk 21. Enkuantu kada karreta ida sei hetan seguransa másima hosi PNTL, akompana hosi brigadista sira no ofisiál supervizaun CNE.
Diretór STAE Munisípiu Bobonaro, Mariano Viegas Amaral, hateten, prosesu distribuisaun ne’e nu’udar faze determinate hosi preparasaun lubuk ida, tanba ne’e presiza kontribuisaun hosi autoridade munisipál to’o lokál atu apoiA ekipa ne’ebe destakadu iha sentru votasaun tomak nune’e bele hatudu rezultadu efisiénsia no efikásia.
Maibé diretór ne’e dehan, importante liu mak ekipa STAE kopera ho ekipa supervizaun CNE atu hala’o serbisu ho rigór tuir lema katak, demokrasia, imparsialidade, neutralidade no transparánsia hodi serbisu hamutuk ho ekipa supervizaun CNE nune’e bele fó susesu ba festa demokrasia ne’e.
“Rai ida-ne’e ita-nian no munisípuu ida ne’e ita-nian la’ós ami (STAE no CNE) nian de’it, tanba ne’e presiza apoiu no kontribuisaun tomak hosi autoridade sivíl no militár sira nune’ atividade eleisaun ida-ne’e la’o ho di’ak to’o faze apuramentu munisípal,” nia ko’alia iha serimónia ne’e.
Sekretáriu Autoridade Munisípiu Bobonaro, João Fátima do Carmo, apresia no kongratula órgaun eleitorál STAE no CNE munisipál maske durante ne’e enfrenta hela difikuldade oinoin maibé konsege halo esforsu hodi ultrapasa dezafiu hirak-ne’e.
“Autoridade munisípiu nafatin prontu apoiu tékniku operasionál no lojístika, ami sei orienta administradór postu sira to’o lideransa komunitária atu korajen ita-nia maluk eleitór sira bele partisipa másimu iha eleisaun segunda volta ne’ebé sei akontese iha 19 abríl,” nia apela.
Diretór CNE Munisípiu Bobonaro, Juvito Ramos, enkoraja ekipa implementadór STAE no ekipa supervizaun sira atu koopera malu, karik mosu lákuna no irregularidade iha sentru votasaun sira tenke foti desizaun tuir kompeténsia idak-idak nian ne’ebé prevista iha Lei Eleitorál ba Prezidente Repúblika no regulamentu sira.
“Ita hotu tenke tau matan nune’e aktu eleitorál tenke la’o tuir regulamentu no kódigu konduta sira, tanba ne’e ha’u husu ba brigada no ofisila supervizaun hotu atu garante prosesu ida-ne’e tenke halo ho transparánsia, imparsiál no nutralidade atu nune’e buat hotu ne’ebé la’o bele hetan ninia kredibilidade,” nia apela.
Serimónia distribuisaun materiál eleisaun prezidensiál ba baze ne’e partisipa hosi administradór postu administrativu sira, diretór munisípiu no diretór delegasaun territoriál sira, obervadór nasionál no internasionál sira, fiskál partidu polítiku no ekipa susesu hosi kandidatu Prezidente Repúblika na’in-rua.
Jornalista : Sérgio da Cruz
Editór : Evaristo Soares Martins
